Исроил Туркияга ҳужум қилиши мумкин – Яшар Гулер

Туркия Мудофаа вазири Яшар Гулер Исроил Туркияга тўғридан тўғри таҳдид солиши мумкинлиги ҳақида қаттиқ огоҳлантирди. Бу ҳақда у ТV100 телеканалига берган интервьюсида сўз очди.

“Президентимиз бу хавфни кўргани учун жамиятни огоҳлантирмоқда. Жаноб Президент Исроилдан эҳтимолий таҳдидни кўрмаса, шундай хавотир билдирармиди?” деди Гулер Исроил Туркия учун тўғридан тўғри таҳдид бўлиши мумкинлиги ҳақидаги саволга.

Шунингдек, Гулер аввалги Жаҳон урушлари қандай қилиб кичик туюлган воқеалардан бошланганини таъкидлаб, тўқнашувлар кутилмаганда келиб чиқиши мумкинлигидан огоҳлантирди. 

“Албатта, урушни хоҳламаймиз, лекин биз унга доимо тайёр бўлишимиз керак”, деди у.

Шунингдек, Мудофаа вазири Туркиянинг устувор вазифаси тинчликни сақлаш эканини, аммо мамлакат хавфсизлик кучлари ҳар қандай эҳтимолий таҳдид учун батафсил режалар тузаётганини билдирди.

“Биз Туркия Республикаси ва турк миллатининг хавфсизлиги учун жавобгармиз. Биз барча имкониятлардан фойдаланамиз ва ҳар бир сценарийни баҳолаймиз”, деди вазир.

Эслатиб ўтамиз, аввалроқ Туркия Президенти Ражаб Тойиб Эрдўған Исроилга нисбатан қурол эмбаргосини жорий қилиш, у билан савдони тўхтатиш ва халқаро миқёсда ажратиб қўйиш зарурлигини таъкидлаган эди.