Исроил тинчликни истамайди – Фидан

Туркия Ташқи ишлар вазири Хоқон Фидан Исроил тинчликни ҳам, барқарорликни ҳам истамаслигини айтди. Бу ҳақда у кеча, 17 июль куни БМТ Хавфсизлик Кенгашининг Ғазо секторидаги гуманитар вазиятга бағишланган фавқулодда йиғилишида сўз очди.

“Исроил тинчликни истамайди. Исроил барқарорликни ҳам истамайди”, деган Фидан. 

Туркия вакилининг таъкидлашича, Исроил томонидан Фаластин халқига қарши амалга оширилаётган геноцид ҳатто айни дақиқаларда ҳам давом этмоқда. Ғазода икки миллиондан ортиқ аҳоли аянчли азоб-уқубатларга дуч келмоқда, мажбурий кўчириш ва вайронагарчилик кенг кўламда давом этмоқда.

Унинг сўзларига кўра, ҳар куни ёрдам етказилишига атайлаб тўсқинлик қилинмоқда, оддий фуқаролар овқат ва сув олиш учун навбатда турган жойларда ўлдирилмоқда.

“Очлик – уруш қуролига айлантирилди. Исроил халқаро гуманитар ҳуқуқнинг барча тамойилларини бузмоқда. Очиғини айтайлик, дунё 80 йилдан сўнг яна концлагерларга гувоҳ бўлаяпти. Бутун халқни йўқ қилиш бўйича кампания олиб борилмоқда”, деган Фидан. 

У Исроил армиясининг нафақат Ғазода, балки Сурияда ҳам ўз тажовузкор стратегиясини кенгайтираётгани, бу эса минтақадаги мувозанатни бутунлай издан чиқаришини таъкидлаган. 

“Бу ҳарбий машина нафратдан куч олади. Бу машина жазодан қутулиш имкониятидан куч олади. Бу машина айрим доиралар томонидан кўрсатилаётган шартсиз қўллаб-қувватлашдан куч олади”, деган Туркия Ташқи ишлар вазири. 

Шунингдек, Фидан БМТдан ташқари ёрдам етказиш бўйича бошқа моделлар бетарафлик ва инсонийлик тамойилларини бузишини айтиб, ёрдамнинг фақат БМТ координацияси остида, барча очиқ йўллар орқали, тўлиқ халқаро гуманитар ҳуқуққа мувофиқ ва ҳеч қандай тўсиқларсиз етказилиши кераклигини билдирган.

“Гуманитар ёрдамнинг асосий тамойиллари – инсонпарварлик, бетарафлик, камситмаслик ва мустақиллик”, деган у. 

Фидан Исроил тажовузи Сурияда муросали тинчликни хавф остига қўйганини айтиб, бунинг бутун минтақага таҳдид солаётганини таъкидлаган. 

“Сурия яна зўравонлик гирдобига тушмаслиги учун бор кучимизни сарфлашимиз керак. Бу жуда катта хавф. Бошқа йўл йўқ”, деган Туркия вакили. 

Қолаверса, у барқарор Яқин Шарқ учун Фаластин халқининг қонуний ҳуқуқлари тан олиниши ва мустақил Фаластин давлати тузилиши ҳалигача устувор масала эканини эслатган. 

“БМТ Хавфсизлик Кенгаши нафақат Ғазо халқини, балки бутун инсоният қадр-қимматини ерга урди. У БМТ асос солинган қадриятлар ва тамойилларга ҳам хиёнат қилди. Бу энди оддий гуманитар инқироз эмас – бу бизнинг жамоавий инсонпарварлигимиз учун синовдир. Ягона тўғри ечим бор. Исроилнинг ҳарбий машинасини тўхтатиш, жазодан қутулишни тўхтатиш, дарҳол ва барқарор ўт очишни тўхтатиш, гуманитар ёрдамга тўлиқ рухсат бериш ва икки давлатли ечимга зудлик билан қайтиш”, дея ўз сўзларини якунлаган Ҳоқон Фидан. 

Эслатиб ўтамиз, АҚШ ва Исроил томонидан қўллаб-қувватланадиган Ғазо гуманитар жамғармаси томонидан бошқариладиган Ғазодаги ёрдам пунктларида ва бошқа ёрдам гуруҳлари, жумладан, Бирлашган Миллатлар Ташкилоти томонидан бошқариладиган конвойларда сўнгги олти ҳафта ичида камида 875 ўлим қайд этилганди.