Исроил Ғазога босқинни тўхтатмоқчи эмаслиги маълум бўлди

Исроил ҳеч кимнинг ўзини ҳимоя қилиш ҳуқуқини шубҳа остига олишига йўл қўймайди ва ҳуқуқий фронтда ҳам, жанг майдонида ҳам курашни давом эттиради. Бу ҳақда Исроил Ташқи ишлар вазири Исраэль Кац Гаагадаги Халқаро судда Жанубий Африканинг Ғазо секторидаги ҳаракатлари юзасидан яҳудий давлатига қарши даъвоси бўйича тингловларни шарҳлар экан айтиб ўтди. 

“Мен Исроил ҳуқуқий жамоамизга Жанубий Африканинг иккиюзламачилигига қарши Гаагадаги Халқаро [БМТ] судида бизни шараф ва ғурур билан ҳимоя қилгани учун миннатдорлик билдираман. Вакилларимиз ҲАМАС қотиллари ва зўравонлари учун қонуний куч бўлган Жанубий Африка юридик гуруҳига айтганидек, ёлғонни минг марта такрорлаш буни ҳақиқатга айлантирмайди. Ҳеч бир куч Исроилнинг ўзини ҳимоя қилиш ҳуқуқидан фойдаланишига тўсқинлик қилмайди. Гаровга олинган 132 киши яқинларига қайтарилгунига қадар биз ҳуқуқий, сиёсий ва ҳарбий жабҳада курашни давом эттирамиз”, деган у ўзининг Х саҳифасида.

Аввалроқ Халқаро судда Жанубий Африканинг Исроилга қарши даъвоси юзасидан тингловлар ўтказилган эди. Жанубий Африка томони вакиллари суддан Исроилни геноцид конвенцияси ва ушбу жараёнда иштирок этаётган томонлардан бири сифатида суднинг аввалги қарорларига мувофиқ, Ғазо секторидаги, жумладан Рафаҳдаги ҳарбий амалиётларни зудлик билан тўхтатиш ва қуролли кучларни бутун анклавдан дарҳол, тўлиқ ва сўзсиз олиб чиқиб кетишни сўради. Ўз навбатида Исроил суддан Жанубий Африкадан келган барча янги сўровларни рад этишни сўради. 

Гаагадаги тингловлар

Жанубий Африка 2023 йил 29 декабрда Гаагадаги Халқаро судга Исроилга қарши иш очди. Жанубий Африка томони суддан Исроил ҳукуматининг Ғазо секторидаги ҳаракатлари геноцид эканлигини тан олишни талаб қилмоқда, чунки бу Ғазодаги фаластинликларни кенгроқ миллий, ирқий ва этник гуруҳнинг бир қисми сифатида йўқ қилиш ниятида амалга оширилмоқда. 

Жанубий Африка, шунингдек, суддан Фаластин аҳолисини ҳуқуқларининг кейинги жиддий ва тузатиб бўлмайдиган бузилишидан ҳимоя қилиш учун вақтинчалик чоралар кўришни сўради. Ҳукумат 26 январь куни Исроил Ғазода геноциднинг олдини олиш учун барча зарур чораларни кўриши керак деган қарорга келди.