Исроил Ғазодаги университетга ҳужум қилди

Исроил кучлари Ғазо шаҳридаги Ғазо ислом университети биносига ҳужум қилди. Бу ҳақда “Anadolu” хабар берди.

Ҳужум оқибатида бино жиддий зарар кўрди. Ҳужумдан олдин ҳарбийлар университетда бўлган фаластинликларни эвакуация қилишга чақирган.

Исроил ҳукумати 8 август куни Ғазо шимолини босиб олиш режасини маъқуллагач, Исроил армияси у ерда яшовчи фаластинликларни жанубга олиб бориш учун ҳужумларни кучайтирди. Ғазо қирғоғидаги вақтинчалик лагерларда аҳвол шунчалик ёмонки, охирги кунларда Исроилнинг қаҳатчиликка дучор бўлган, Ғазо шаҳрига йўналтирилган янги ҳужумидан қочган баъзи одамлар энди портлаётган бомбаларга қарамай, яна шаҳарга қайтишга мажбур бўлмоқда. Қочоқлар, асосан, Ғазо шаҳри ғарбидаги денгиз бўйи ва ёки жанубдаги Маваси ҳудудига йўналмоқда. Маваси – Исроил томонидан “гуманитар зона” деб белгиланган, денгиз соҳили ва қишлоқ ерлари бўйлаб чўзилган катта чодир шаҳарчаси. Бироқ бу ерга келган кўпчиликка чодир топилмади, сув таъминоти жуда кам, тиббий ёрдам етарли эмас. 

Исроил Бош вазири Биньямин Нетаньяху эса “бутун Ғазо устидан назорат ўрнатиш” ниятини билдирди. Маълумот учун, Исроил Ғазо секторини 1967 йилдан 2005 йилгача 38 йил давомида босиб олган. 2,3 миллионга яқин аҳолига эга бўлган эксклав 18 йилдан бери қаттиқ блокадада.