Испанияда иккита тезюрар поезд тўқнашди. Ўнлаб қурбонлар бор (видео)

Бугун, 28 октябрь куни Испания марказидаги Толедо провинциясида иккита юқори тезликда ҳаракатланувчи поезднинг тўқнашиб кетиши оқибатида камида 10 киши ҳалок бўлгани ва яна кўплаб одамлар жароҳат олгани айтилмоқда. Бу ҳақда “The Guardian” хабар берди.

Қайд этилишича, Испания давлат темир йўл инфратузилмаси бошқармаси бугун, 28 октябрь куни эрталаб икки поезд ўртасидаги орқадан тўқнашувдан сўнг Мадрид ва жанубий Андалусия минтақаси ўртасидаги қатновлар тўхтатилганини маълум қилган.

Ҳалокат юз берган Кастилия-Ла-Манча минтақавий ҳукумати вакили тўқнашув сабаблари ва жароҳатланганлар сони ҳали аниқланаётганини билдирган.

Ҳукуматдаги манбалар “El País” нашрига маълум қилишича, камида 10 киши ҳалок бўлган ва ушбу ҳалокат оқибатлари январь ойида 46 кишининг ёстиғини қуритган Адамус темир йўл фожиасидан ҳам оғирроқ бўлиши мумкин.

Испаниянинг TVE давлат телеканалининг хабар беришича, ҳалокат юқори тезликда ҳаракатланувчи поезд бошқа бир таркибнинг орқа қисмига бориб урилиши ва икки вагонни издан чиқариб юбориши оқибатида юз берган.

Толедо шаҳри яқинидаги Урда шаҳри ҳокими Мануэль Галан фавқулодда хизматлар ундан жароҳатланганларни жойлаштириш учун спорт залини тайёрлашни сўраганини айтган.

Кейинги ойда бўлиб ўтадиган умумий сайловларга тайёргарлик кўраётган Испаниянинг асосий сиёсий партиялари кунлик режалаштирилган тадбирларини тўхтатган.

Бош вазир Педро Санчес ҳалокат ҳақидаги хабардан ҳайратда эканини билдирган. 

“Мен Транспорт вазири ва Кастилия-Ла-Манча президенти билан доимий алоқада бўлиб турибман. Фавқулодда хизматлар барча тегишли идоралар билан мувофиқлашган ҳолда жабрланганларга ёрдам бериш ва уларнинг хавфсизлигини таъминлаш учун жойида иш олиб бормоқда. Барча қурбонлар ва уларнинг оилаларига ўзимнинг ҳамдардлигим ва қўллаб-қувватлашимни билдираман”, деб ёзди у X ижтимоий тармоғидаги постида. 

Эслатиб ўтамиз, аввалроқ Покистоннинг Панжоб вилоятида йўловчи поездининг рельсдан чиқиб кетиши оқибатида камида олти киши ҳалок бўлганди ва 30 киши жароҳатланган эди.