Испания Жаҳон чемпионати финалига чиқди

Бугун, 15 июль куни АҚШнинг Техас штати, Арлингтон шаҳрида бўлиб ўтган 2026 йилги Жаҳон чемпионати ярим финал учрашувида Испания терма жамоаси Францияни 2:0 ҳисобида мағлуб этди.

Испанлар сафида голларга Микель Оярсабаль 22-дақиқада пенальтидан ва Педро Порро 58-дақиқада муаллифлик қилди.

Шу тариқа, Луис де ла Фуэнте шогирдлари Жаҳон чемпионати финалига йўл олди. Испания ҳал қилувчи баҳсда Англия – Аргентина учрашуви ғолиби билан куч синашади.

Қайд этиш жоиз, Испания терма жамоаси ўз тарихида иккинчи марта Жаҳон чемпионати финалига чиқди. Испанлар бундан аввал 2010 йилда Жанубий Африкада бўлиб ўтган мундиаль финалида Нидерландияни қўшимча бўлимларда 1:0 ҳисобида мағлуб этиб, илк бор жаҳон чемпиони бўлган эди.

Франция эса 2014 йилдан бери илк бор Жаҳон чемпионати финалига чиқа олмади. Ўшанда французлар чорак финалда Германияга 1:0 ҳисобида мағлуб бўлиб, мусобақани тарк этган эди. Кейинчалик Германия ўша мундиал чемпионига айланган.

Шундан сўнг Франция 2018 йилги Жаҳон чемпионатида чемпионликни қўлга киритди, 2022 йилги мундиалда эса финалгача етиб борди, бироқ Аргентинага драматик баҳсда мағлуб бўлди. Асосий ва қўшимча вақт 3:3 ҳисобида якунланган бўлса, пенальтилар сериясида аргентиналиклар 4:2 ҳисобида устун келган.

Эътиборлиси, Испания ва Франция сўнгги учта йирик турнирда кетма-кет ярим финалда ўзаро тўқнаш келди. Испанлар аввалроқ Евро-2024 ярим финалида 2:1, 2025 йилги UEFA Миллатлар лигаси ярим финалида эса 5:4 ҳисобида ҳам ғалаба қозонган эди.