“Интер Майами” тарихда илк бор Чемпионлар лигасида иштирок этади

Бугун, 16 август куни Аргентиналик футболчи Лионель Месси бошчилигидаги АҚШнинг “Интер Майами” клуби МЛС + МХ Лига кубогининг финал йўлланмасини қўлга киритди.

“Субару Парк” стадионида бўлиб ўтган ярим финал учрашувида “Филадельфия Юнион” устидан қозонилган 4:1 кўринишидаги ғалаба “Интер Майами”га мазкур мусобақа финалини ва ўз тарихида илк бор Шимолий Америка Чемпионлар лигасида иштирок этиш ҳуқуқини тақдим этди. 

Лига кубоги клублар ўртасидаги турнир бўлиб, унда АҚШ ва Мексика жамоалари ўйнайди. Бу йилдан бошлаб у КОНКАКАФ ҳомийлигида расмий мусобақага айланди. Лига кубогининг энг яхши учта жамоаси автоматик равишда 2024 йилги КОНКАКАФ Чемпионлар Кубогида (аввал Чемпионлар лигаси номи билан аталган) иштирок этиш ҳуқуқини қўлга киритади.

Унга кўра, МЛС + МХ Лига кубогининг финалчилари “Интер Майами” ва “Нашвилл” клублари аллақачон мазкур йўлланмани ўз номига банд қилиб улгурган, фақат уларнинг қай бири 1-ўрин билан чиқишини аниқлаб олиш қолган. 

Маълумот учун, ҳар иккала клуб ҳам ушбу турнирда илк бор ўйнайди. Улар мусобақани айнан қайси босқичдан бошлаши 20 август куни бўлиб ўтадиган Лига кубоги финали натижасига боғлиқ бўлади. Ғолиб тўғридан-тўғри 1/8 финалга йўл олади.

“Филадельфия Юнион” ва “Монтеррей” жамоалари ўртасидаги учрашув ғолиби эса КОНКАКАФ турнирига учинчи ўринда чиқиш йўлланмасини қўлга киритиш учун баҳслашади.