Имомали Раҳмон Шольцни Тожикистонга таклиф қилди

Тожикистон Президенти Имомали Раҳмон бугун, 17 сентябрь куни Германия федерал канцлери Олаф Шольц билан учрашиб, уни Тожикистонга таклиф қилди. Бу ҳақда Тожикистон раҳбари матбуот хизмати хабар берди.

Суҳбатдошлар икки томонлама алоқаларни кенгайтиришни ва минтақавий ҳамкорлик масалаларини муҳокама қилган. Шунингдек, Раҳмон Тожикистон миллий стратегияларини амалга оширишда Германия халқаро ҳамкорлик жамияти (GIZ) ва Германия тараққиёт банки (КfW)нинг катта ҳиссасини алоҳида таъкидлаган.

Қайд этилишича, Шольц Германиянинг Тожикистон билан энергетика соҳасида, жумладан, гидроэнергетика ва бошқа яшил энергия манбалари, тоғ-конь саноати, шунингдек, атроф-муҳитни муҳофаза қилиш ва хавфсизлик масалалари бўйича ҳамкорлик қилишдан манфаатдор эканлигини билдирган.

“Биз глобал нуфузга эга немис компанияларини Тожикистон билан ҳамкорлик қилишга чақирамиз”, деган канцлер.

Эслатиб ўтамиз, 15 сентябрь куни Ўзбекистон Республикаси Президенти Шавкат Мирзиёев Самарқандда, кеча, 16 сентябрь куни Қозоғистон Республикаси Президенти Қосим-Жомарт Тўқаев Остонада Германия федерал канцлери Олаф Шольц билан тор ва кенгайтирилган доирада музокаралар ўтказганди.