Илон Маск Ўзбекистонга келиши мумкин

2028 йилда International Astronautical Congress (IAC) анжумани Самарқанд шаҳрида ўтказилиши мумкин. Бу ҳақда “Ўзбеккосмос” агентлиги матбуот хизмати хабар берди.

Қайд этилишича, жаҳон космик майдонидаги энг йирик халқаро анжуманлардан бири бўлган IAC ҳар йили бутун дунёдан 10 мингга яқин космос саноати етакчилари, соҳада илмий тадқиқотлар олиб бораётган етакчи компания ва агентликлар вакилларини бир мулоқот платформаси атрофида жамлайди. 

2023 йилда бу нуфузли тадбирга Озарбайжон мезбонлик қилган бўлса, 2024 йилда анжуман конгресси Италиянинг Милан шаҳрида ўтказилган. Жорий йилнинг 29 сентябрь -3 октябрь кунлари эса у Австралияда ўтказилади. 

Қайд этилишича, Uzcosmos вакиллари IAC-2028’ни Самарқандда ўтказиш таклифи билан Ўзбекистон номзодини илгари сурган. 

“Бу орқали хорижий компания ва агентликларни мамлакатда илмий марказлар, инкубаторлар, технопарклар қуришга жалб этиш, қўшма тадқиқотларда иштирок этишга қизиқтириш, янги стартапларни намойиш этиш имконияти пайдо бўлади”, дейилади хабарда. 

Маълумот учун, сўнгги йилларда IAC Милан (2024), Баку (2023), Париж (2022), Дубай (2021), Вашингтон (2019), Бремен (2018) ва Аделаида (2017) каби шаҳарларда ўтказилган ва мазкур мамлакатлар учун сезиларли натижаларни берган. Масалан, Париждаги IAC-2022 тарихдаги энг йирик конгресс бўлиб, Франциянинг глобал космик соҳада етакчи давлат сифатидаги позициясини мустаҳкамлади ҳамда хусусий секторнинг фаол иштирокига хизмат қилган. IAC-2017’дан сўнг Австралия космик агентлиги ташкил этилган. Германия ва АҚШда эса конгресснинг ўтказилиши халқаро ҳамкорликни мустаҳкамлаш ва стартапларни глобал космик иқтисодиётга кенг жалб қилишга ёрдам берган. 

Қўшимча қилинишича, ушбу нуфузли тадбирни Ўзбекистонда ўтказиш имкониятлари билан яқиндан танишиш мақсадида Халқаро астронавтика федерацияси ижрочи директори Кристиан Файхтингер Самарқанд ва Тошкент шаҳрида текширув-кузатув ишларини олиб бориб, конгрессни қабул қилишга тайёрлик даражаси, моддий-техник база, транспорт ва меҳмонхона инфратузилмаси, хавфсизлик, ижтимоий тадбирларни ташкил этиш ҳудудлари билан яқиндан танишган, вазирлик ва идоралар масъуллари билан учрашувлар ўтказган. 

Қайд этиш жоиз, Илон Маск шу вақтгача ўтказилган мазкур анжуманларга махсус вакил сифатида қатнашиб, муваффаққиятли лойиҳаларни доимо илгари суриб келган. Агар анжуман Самарқандда ўтказилса, унга миллиардер Илон Маск ҳам ташриф буюриши мумкин. Аммо бу ҳали номаълум.

Эслатиб ўтамиз, аввалроқ Ўзбекистон 2028 йилгача ўзининг илмий-техник сунъий йўлдошини коинотга чиқаришни режалаштираётгани ҳақида хабар берилганди.