Икки карра “Олтин тўп” соҳиби Кевин Киган вафот этди

Икки карра “Олтин тўп” соҳиби, Англия терма жамоасининг собиқ футболчиси ва мураббийи Кевин Киган 75 ёшида вафот этди. Бу ҳақда унинг оиласи баёнотига таяниб, “Sky” хабар берди.

Нашрнинг ёзишича, жорий йилнинг 1 июнь куни Киган BBC Sport нашрига берган интервьюсида унга тўртинчи босқич саратон ташхиси қўйилганини маълум қилган эди.

“Чуқур қайғу билан Кевин Киган 75 ёшида вафот этганини маълум қиламиз. Англия терма жамоасининг собиқ футболчиси ва мураббийи саратон касаллигига қарши курашди ва ҳаётининг сўнгги дақиқаларида рафиқаси ҳамда қизлари бағрида бўлди. Оила Кевинга ғамхўрлик қилган барча шифокорлар ва тиббиёт ходимларига миннатдорчилик билдиради”,  дейилади оила баёнотида.

Футболчилик фаолияти давомида Киган Англияда “Ливерпуль”, “Ньюкасл” ва “Саутгемптон”, Германияда “Гамбург”, Австралияда эса “Блэктаун Сити” клублари шарафини ҳимоя қилган.

У “Ливерпуль” билан уч марта Англия чемпиони бўлган, икки марта Англия Суперкубоги, икки марта UEFA Кубоги, шунингдек, бир марта Англия Кубоги ва бир марта Европа Кубогини қўлга киритган. “Гамбург” сафида эса Германия чемпионлиги ва мамлакат Кубогида ғолиб чиққан.

Киган 1978 ва 1979 йилларда “Олтин тўп” совринини қўлга киритиб, ушбу мукофотни икки марта ютиб олган ягона англиялик футболчи сифатида тарихга кирган. 2002 йилда у Англия футбол шон-шараф залига киритилган.

Футболчилик фаолиятини якунлаганидан сўнг Киган мураббийлик қилди. У “Ньюкасл”, “Фулҳэм” ва “Манчестер Сити” клублари, шунингдек, Англия миллий терма жамоасини бошқарган.