Гризманн мухлислардан “Барса”га ўтгани учун узр сўради

Кеча, 17 май куни Антуан Гризманн “Атлетико Мадрид” мухлислари билан хайрлашув учрашувини ўтказди. Унда Гризманн клуб мухлисларидан бир вақтлар “Барселона”га ўтгани учун узр сўради.

“Аввало, қолганингиз учун раҳмат. Бу мен учун жуда муҳим. Айрим мухлислар ҳали ҳам мени кечирмаганини биламан, шунинг учун яна бир бор узр сўрамоқчиман. Мен бу ерда қанчалик қадрли эканимни ўша пайтда англамаган эканман. Ёш эдим, хато қилдим, кейин фикримни ўзгартирдим ва қайтиб келиб, ўша туйғуларни яна ҳис қилиш учун қўлимдан келганича ҳаракат қилдим”, дейди Гризманн.

Аввалроқ, 35 ёшли франциялик ҳужумчи жорий мавсум якунида мадридликлар сафини тарк этиши ва фаолиятини “Орландо Сити”да давом эттириши маълум қилинган эди.

“2014 йилдан буён барча жамоадошларимга миннатдорчилик билдираман. Мураббийлар штабига, айниқса Диего Симеонега алоҳида ташаккур. У ҳамма нарсани ўзгартирди. Бу стадиондаги муҳит ва иштиёқ туфайли мен жаҳон чемпиони бўлдим ва ўзимни энг яхшилардан бири сифатида ҳис қилдим. Тўғри, биз Ла Лига ёки Чемпионлар лигасида ғалаба қозона олмадик. Аммо бугунги ғалаба мен учун жуда муҳим. Сизларнинг меҳрингизни умр бўйи қадрлайман. Ва ниҳоят, фарзандларингизни бу ерга олиб келиб, уларга “Атлетико” нима эканини — дунёдаги энг яхши клубни кўрсатганингиз учун раҳмат”, дейди Гризманн.

Маълумот учун, Антуан Гризманн 2014–2019 йилларда “Атлетико Мадрид” сафида тўп сурган, шундан сўнг “Барселона”га ўтган эди. У 2021 йилда яна мадридликлар сафига қайтди. Франциялик футболчи “Атлетико” билан Европа лигаси, UEFA Суперкубоги ва Испания Суперкубогининг бош совринларини қўлга киритган.