Google сунъий интеллект билан ишловчи янги ноутбукини тақдим этди

Google “The Android Show: I/O Edition 2026” тақдимотида янги Googlebook ноутбуклари линиясини намойиш қилди. Компания уларни Chromebook’дан кейинги босқич деб атаган ва асосий эътиборни Gemini сунъий интеллекти билан чуқур интеграцияга қаратмоқда.
 

Маълум қилинишича, Googlebook’лар Android ва ChromeOS’ни бирлаштирадиган янги платформада ишлайди. Бу эса, ўз навбатида Google аста-секин классик Chromebook’лар ўрнига тўлиқ AI-ноутбук концепциясига ўтаётганини билдиради.
Илк қурилмалар 2026 йил кузида сотувга чиқиши белгиланган. Улар устида Acer, ASUS, Dell, HP ва Lenovo компаниялари иш олиб бормоқда.

Googlebook’нинг асосий хусусиятларидан бири сифатида Glowbar – ноутбук корпусидаги ёруғлик панели назарда тутилган. Компаниянинг хабар беришича, бу оддий декоратив ёритиш эмас, балки алоҳида функционал элемент ҳисобланади. Бироқ ҳозирча у аниқ нима вазифани бажариши очиқланмаган.

Қурилманинг яна бир қизиқ функция эса Magic Pointer бўлиб, у Gemini AI қўллаб-қувватловига эга ақлли курсор бўлиб, у фойдаланувчи курсорни қайси элементга олиб борганига қараб амалларни таклиф қилади. Масалан, агар курсор хатдаги санани аниқласа, тизим дарҳол учрашув белгилашни таклиф қилади. Агар хона ва мебель сурати танланса, тизим улар бирга қандай кўринишини кўрсатиб бера олади.

Googlebook Android-смартфонлар билан ҳам яқин интеграцияга эга бўлади. Фойдаланувчилар мобил иловаларни ноутбукнинг ўзида ишга тушира олади, файлларни тез ўтказади ва қурилмалар ўртасида иш жараёнини синхронлаштириш имкониятига эга бўлишади.

Интернетда анонс аллақачон баҳсларга сабаб бўлиб улгурди. Айрим фойдаланувчилар Googlebook’ни “Chromebook 2.0” деб атаётган бўлса, бошқалар Google ниҳоят Microsoft ва Apple’нинг AI-PC қурилмаларига тўлиқ рақобатчи тайёрлаганини айтмоқда.

Эслатиб ўтамиз, аввалроқ Google ва шу каби бошқа компаниялар Ўзбекистон бозоридаги фаолияти учун жорий йил бошида қанча солиқ тўлагани ҳақида маълумот берилган эди.