Гитлер туғилган уй полицияга топширилди

Австриянинг Браунау-ам-Инн шаҳрида Адольф Гитлер 1889 йилда туғилган уйда янги полиция бўлими ва туман полиция бошқармаси иш бошлади. Австрия ҳукумати бинога нацизм тарафдорлари учун рамзий аҳамият қолдирмаслик мақсадида уни тўлиқ реконструкция қилди. Бу ҳақда “Deutche Welle” хабар берди.

Нашр маълумотига кўра, Зальцбургер-Форштадт кўчаси, 15-уй тўлиқ таъмирланиб, унинг ташқи кўриниши ҳам ўзгартирилган. Ҳукумат бир неча йил давомида мазкур уйни “нейтраллаштириш” режасини ишлаб чиққан. Унинг асосий мақсади бинога нацизм тарафдорлари учун рамзий аҳамият қолдирмасликдан иборат бўлган.

Қайд этилишича, Гитлернинг ота-онаси ушбу уйда квартира ижарага олган бўлиб, ўғли туғилганидан уч йил ўтиб у ердан кўчиб кетган. 1938 йилда Австрия фашистлар Германиясига қўшиб олингач, бинога Миллий социалистик немис ишчилар партияси (NSDAP) эгалик қилган ва у ерда “мафкуравий марказ” ташкил этган.

Иккинчи жаҳон урушидан кейин бино кутубхона, банк, таълим муассасаси ва ижтимоий устахона сифатида фойдаланилган. 2011 йилдан буён эса бўш қолган. 2016 йилда Австрия ҳукумати уйнинг эгаларига товон пули тўлаб, уни давлат тасарруфига олган.

Бироқ бу қарор маҳаллий аҳоли ва жамоатчилик фаолларининг бир қисми томонидан танқид қилинди. Уларнинг фикрича, бинода полиция бўлими эмас, балки нацизм ва Иккинчи жаҳон уруши оқибатларига бағишланган хотира, демократия ва маърифат маркази ташкил этилиши керак эди.

Уй олдида “Тинчлик, эркинлик ва демократия учун. Фашизм такрорланмасин. Миллионлаб қурбонлар бу ҳақда огоҳлантириб туради”, деган ёзув туширилган мемориал тош сақлаб қолинган. Шу билан бирга, Австрия ҳукумати бинога янги мақом берилиши унинг келажакда қандай мақсадларда фойдаланилиши борасидаги баҳсларга нуқта қўяди, деб ҳисобламоқда.

Эслатиб ўтамиз, аввалроқ Гитлернинг Берлиндаги бункери ўрнида тураржой биноси қурилиши мумкинлиги ҳақида хабар берилган эди.