3 ёшли бола энагасининг эри томонидан дўппослаб ўлдирилган(ми?)

Тошкентнинг Яшнобод туманида яшовчи аёл энага қарамоғида бўлган фарзандининг фожиали ўлими ортидан даҳшатли тафсилотларни очиқлади. Дастлаб заҳарланиш дейилган ҳолат расмий хулосаларда рад этилиб, боланинг оғир тан жароҳатлари олгани маълум бўлди. Она соғлиғи сабаб фарзандини аввалдан таниш энагага ишониб топширганини айтди.

“Таниш бўлганлиги туфайли ишонгандим, у опа опамнинг қизи, жиянимга ҳам қараган эди. Таниш эди”, дейди у.

Аёлнинг сўзларига кўра, энага болага яхши қарашни ваъда қилган. 

“Болаларим билан бирга қараб, югуриб, ўйнаб юради, “яхши қарайман”, деган”, дейди она.

Онанинг соғлиғи эса унга фарзандига мустақил қараш имконини бермаган.

“Ўзимнинг судиргим бор, эпилепсия касалим бор. Ўзим қарай олмайман. Шунинг учун Қозоғистонга даволанишга кетган эдим”, дейди у.

Шунингдек, она энага хизматлари учун ойига 3 миллион сўмдан тўлаб келганини билдирди. Бироқ Рамазон ойида моддий қийинчилик сабаб тўлиқ пул бера олмаган. 

“Ойига 3 миллион сўм берардим. Рамазон ойида пул қилиб бера олмадим, 2 миллион бердим, 1 миллион қарз бўлиб қолди. Шунда у “қарзингни тўласанг болангни кўрасан, бўлмаса кўрсатмайман”, деб ҳам айтган”, дейди она. 

Аёл операциядан кейин ўғлининг вафоти ҳақидаги хабарни эшитган. Дастлаб унга бола заҳарланишдан ўлгани айтилган. Бироқ кейинчалик бу маълумот рад этилган.

“Касалхонадан чиққанимда “отравление бўлиб ўлди” дейишди. Ҳамма шуни айтди”, дейди она.

Ҳуқуқ-тартибот идоралари эса боланинг танасида оғир жароҳатлар борлигини билдирган. 

“Терговчилар “бу заҳарланиш эмас, ҳамма жойи кучли жароҳат” деди”, дея қўшимча қилади у. 

Боланинг жасадини кўрганлар ҳам унинг танасида оғир зўравонлик аломатлари бўлганини тасдиқлаган. 

“Кўзи очиқ, ҳамма жойи қонаб, йиртилиб ётибди”, деган терговга алоқадор шахслардан бири.

Жасадни ювган аёл эса жароҳатлар қўл билан эмас, балки қаттиқ буюм орқали етказилганини айтган. 

“Бу қўлда урилмаган, темирда уришган”, деган у. 

Морг ходимлари ҳам шу хулосани тасдиқлаган. Онанинг айтишича, боланинг танасидаги жароҳатлар даҳшатли даражада бўлган. 

“Қулоғи йиртилган, бошининг орқа қисми ёрилган, тишлари синган, лаблари қон талаш бўлиб шишиб кетган эди”, дейди у.

Ҳолат юзасидан энаганинг онаси ҳам кўрсатма берган.

“Қизимни кечиринг, қизимда айб йўқ, қизим ҳомиладор”, дейди у. 

Бироқ жабрланувчи томон бу масалани ўзлари ҳал қилмаслигини билдирган. 

“Мен аралашмайман, опаларим ҳал қилади”, деган оила аъзоси.

Кейинчалик энаганинг ўзи ҳам телефон орқали йиғлаб, кечирим сўраган ва болани “бериб қўйганини” айтган.

“Одина, кечир мени, болангни бериб қўйдим”, деган у.

Шунингдек, оила томонидан олиб борилган суриштирувлар давомида энаганинг турмуш ўртоғи ҳақида ҳам хавотирли маълумотлар аниқланган. Маълум бўлишича, у яқинда қамоқдан чиққан ва гиёҳвандлик билан боғлиқ муаммоларга эга бўлган. Бундан ташқари, унинг аввал ҳам зўравонлик ҳолатларига алоқадор бўлгани айтилмоқда.

Мазкур ҳолат бўйича Болалар омбудсмани ўрганиш олиб бормоқда. Ҳозирда прокуратура органлари томонидан терговга қадар текширув ҳаракатлари давом эттирилмоқда. Ҳолат юзасидан 2023 йилда туғилган вояга етмаган З.А. га нисбатан содир этилган жиноят бўйича Жиноят кодексининг 104-моддаси 3-қисми “д” банди билан жиноят иши қўзғатилган. Гумон қилинувчи А.Х. 2026 йил 18 март куни процессуал тартибда ушланган. Тергов ҳаракатлари давом этмоқда.

Беҳзод Шамсутдинов