Germaniyada parlament saylovlari: kansler o‘zgaradi

Kecha, 23 fevral kuni Germaniya Federativ Respublikasida bo‘lib o‘tgan muddatidan avvalgi parlament saylovlarida Fridrix Mersning Xristian-demokratik va Xristian-sotsial ittifoqi (XDS/XSS) partiyasi g‘alaba qozondi. Bu haqda “Deutsche Welle” xabar berdi.

Dastlabki rasmiy ma’lumotlarga ko‘ra, XDS/XSS saylovchilarning 28,6 foiz ovozini qo‘lga kiritgan. Germaniya uchun muqobil (AdG) partiyasi o‘z tarixida ilk bor ikkinchi o‘rinni egallab, 20,8 foiz ovoz olgan. Hukmron Germaniya Sotsial-demokratik partiyasi (SDPG) esa o‘z tarixidagi eng yomon natijani qayd etib, 16,4 foiz ovoz bilan uchinchi o‘rinda qolgan.

Bundestag tarkibiga, shuningdek, “Yashillar” partiyasi (11,6%) va “Chap partiya” (8,8%) ham kirgan.

Besh foizlik to‘siqni “Sara Vagenknecht ittifoqi — Aql va Adolat uchun” partiyasi hamda Erkin demokratik partiya (EDP) yenga olmadi. Vagenknecht partiyasi Bundestagga kirish uchun bor-yo‘g‘i 0,028 foiz ovoz yetishmadi.

Shunday qilib, XDS/XSS Bundestagda 208 ta, AdG – 151 ta, SDPG – 121 ta, “Yashillar” – 85 ta, “Chap partiya” – 64 ta o‘ringa ega bo‘ladi. Bundan tashqari, bir nafar mustaqil nomzod ham parlamentga kiradi.

Bo‘lajak kansler Fridrix Mers hukumatni Pasxagacha shakllantirishini ma’lum qildi, ya’ni 20 aprelgacha

Olaf Shols Mersni saylovdagi g‘alabasi bilan tabriklab, o‘z partiyasining natijasini “achchiq” mag‘lubiyat deb atadi.

Garchi XDS/XSS saylovda birinchi o‘rinni egallagan bo‘lsa-da, Bundestagda mustaqil ko‘pchilikni qo‘lga kirita olmaydi (buning uchun 630 o‘rindan 316 tasiga ega bo‘lish talab etiladi). Bundestagdagi ikkinchi eng yirik fraksiya Germaniya uchun muqobil (AdG) partiyasi bo‘ladi, biroq mamlakatdagi boshqa partiyalar bu partiya bilan hamkorlik qilishni tabu deb biladi. Mers ham XDS/XSS ultrayo‘nalishdagi partiya bilan koalitsiya tuzmasligini tasdiqlagan.