Германияда футбол ўйинида катта жанжал содир бўлди (видео)

Кеча, 25 январь куни Бундеслига 2 19-тур доирасидаги “Магдебург” ва “Динамо Дрезден” жамоалари ўртасида бўлиб ўтган футбол учрашуви давомида мухлислар ўртасидаги тўқнашувлар оммавий тартибсизликларга айланиб кетди. Бу ҳақда DW хабар берди.

Маҳаллий Ички ишлар вазирлигининг маълумотларига кўра, биринчи бўлим охирида “Магдебург” мухлислари Динамо мухлислари эгаллаб турган секторга ўтишга ҳаракат қилган. Полиция буни тўсиб, тартибни сақлашга уриниши ортидан тўқнашувлар бошланган.

Маълумотларга кўра, полицияга пиротехника воситалари, металл тўсиқлар, тошлар, шунингдек йўлак плиталари билан ҳужум қилинган. Оқибатда камида 64 нафар полиция ходими жароҳат олган, уларнинг баъзилари жиддий аҳволда. Шулардан 17 нафари оғир жароҳатлар билан шифохонага ётқизилган.

Ички ишлар вазирлиги хабарига кўра, иккала жамоа мухлислари томонидан бир неча марта пиротехника воситалари ишга туширилиши оқибатида ўйин вақтинча тўхтатилган. Стадиондаги тўқнашувлардан ташқари Магдебург шаҳрида талончилик ва мулкка зарар етказиш каби бошқа ҳуқуқбузарликлар ҳам қайд этилган.

Полиция бошлиғи Тамара Зиэсчанг мухлисларнинг тартибсизликларини “энг қатъий сўзлар билан” қоралаган ва махсус ишчи гуруҳ томонидан тергов бошланганини маълум қилган.

Стадионга тахминан 28 000 киши ташриф буюрган. Ўйинни юзлаб полиция ходимлари, жумладан, бошқа федерал штатлар ва Германия Федерал полициясидан келган мутахассислар назорат қилган. Учрашув якунда 2:1 ҳисобида “Динамо Дрезден” фойдасига якунланган.

Эслатиб ўтамиз, аввалроқ “Индепендьенте Медельин” ва “Атлетико Насьональ” жамоалари ўртасидаги Колумбия кубоги финалида мухлислар ўртасидаги тўқнашувда юзага келиши оқибатида 59 киши жароҳат олган эди.