Германияда болалар қотили сифатида танилган “ниқобли одам” Францияда ҳам умрбод қамалди

Германияда уч нафар болани ўлдирганлик учун аввалдан умрбод қамоқ жазосини ўтаётган ва “ниқобли одам” лақаби билан танилган 55 ёшли немис Мартин Н. Францияда яна бир бола қотиллиги учун айбдор деб топилди. Бу ҳақда “Deutsche Welle” хабар берди.

Франциянинг Нант шаҳри суди уни 2004 йил апрель ойида 10 ёшли Жонатанни ўғирлаб кетиш ва ўлдиришда айбдор деб топиб, умрбод қамоқ жазосига ҳукм қилди.

Жонатан Франциянинг Сен-Бревен-ле-Пен шаҳридаги мактаб оромгоҳидан ўғирлаб кетилган эди. Бир неча ҳафтадан кейин унинг жасади зўравонлик аломатлари билан ўғирлаб кетилган жойдан тахминан 30 километр узоқликдаги кўлдан топилган.

Суд жараёнида Мартин Н. қотилликка алоқадорлигини қатъий рад этди. Унинг ҳимоячилари эса айбланувчининг ўша вақтда Францияда бўлганини тасдиқловчи аниқ далиллар мавжуд эмаслигини таъкидлаб, оқлашни талаб қилди.

Мартин Н. Германияда қарийб 20 йил давомида кичик ёшли болаларга нисбатан жинсий зўравонлик қилган ва 8, 9 ҳамда 13 ёшли уч нафар болани ўлдирган. У узоқ вақт давомида икки хил ҳаёт кечириб, кундузи болалар оромгоҳлари ва интернатларда тарбиячи бўлиб ишлаган, кечалари эса юзига қора ниқоб кийган ҳолда жиноятлар содир этган. Шу сабабли унга “ниқобли одам” лақаби берилган.

Унинг жиноятлари қурбонлардан бирининг кўрсатмалари орқали фош этилган. Кейинчалик Мартин Н. 2011 йилда қўлга олиниб, 2012 йилда умрбод қамоқ жазосига ҳукм қилинган. Суд жараёнида у жиноятларининг катта қисмини тан олган.

Франциядаги Жонатан иши бўйича DNK ёки бошқа бевосита далиллар топилмаган. Бироқ терговчиларни бир қатор билвосита далиллар ишонтирган. Хусусан, гувоҳлардан бири боланинг жасади топилган кўл яқинида Германия рақамли автомобилни кўрганини айтган. Шунингдек, 2017 йилда Мартин Н. билан бир камерада сақланган маҳбуслардан бири у Францияда бола ўлдирганини тан олганини маълум қилган.

Суд прокуратуранинг қотиллик услуби Мартин Н.нинг Германияда содир этган жиноятларига ўхшаш экани ҳақидаги далилларини асосли деб топди ва уни айбдор деб эълон қилди.