Ғарб санкциялари кўплаб ўнгланмас оқибатларга олиб келади – Россия ТИВ

Москва АҚШ ва Европа Иттифоқининг чексиз ва ноқонуний санкцияларига жавоб чоралари устида ишламоқда. Бу ҳақда Россия Ташқи ишлар вазирлигининг Европа биринчи департаменти директори Алексей Парамонов РИА Новостига берган интервьсида айтиб ўтган. 

"Россия АҚШ ва ЕИнинг мисли кўрилмаган миқёсдаги чеклов чоралари ва халқаро ҳуқуқ нуқтаи назаридан қараганда ноқонуний санкциялар босимига жавоб чораларини ишлаб чиқмоқда”, дейди Парамонов. 

Шу билан бирга, Парамонов гап мажбурий жавоб ҳақида кетаётганини урғулаган. 

“Санкциялар бизнинг танловимиз эмас. Биз Россияга "тўлиқ молиявий ва иқтисодий уруш" эълон қилган Франция Иқтисодиёт вазири Брюно Ле Мэрнинг баёнотлари мантиғи Италияда ўз издошларини топиб, бир қатор ўнгланмас оқибатларга олиб келишини хоҳламаймиз", дейди у. 

Эслатиб ўтамиз, Ғарб мамлакатлари Украинада бошланган урушга жавобан Россияни ҳар томондан сиқувга олиб, оғир санкцияларни қўллай бошлади. Рубль курси қулади, Россия банклари SWIFT халқаро банклараро тизимидан узилди. Марказий банкнинг хориждаги олтин-валюта захиралари блокланди. Миллардерларнинг ҳам чет элдаги кўплаб ҳисоблари музлатилди.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. 

Бундай санкцияларга Россия ҳам жим қараб турмаяпти. Мамлакат Ташқи ишлар вазирлиги кеча, 15 март куни АҚШга қарши жавоб санкцияларни эълон қилди. Москва “қора рўйхат”га АҚШ Президенти Жо Байден, Давлат котиби Энтони Блинкен, Мудофаа вазири Ллойд Остин, АҚШ Президентининг ўғли Хантер Байден ва бошқаларни киритган.

Россияга қарши санкциялар жорий этиш давом этмоқда.