“Ғарб бирлиги чиқинди қутисига ташланди”. Европа Аляска саммитидан норози бўлмоқда

Бутун дунё АҚШ Президенти Дональд Трамп ва Россия Президенти Владимир Путиннинг учрашувини тинимсиз муҳокама қилаётган бир пайтда Европа Аляскадаги саммитдан у қадар хурсанд эмаслигини билдирмоқда. Хусусан, Европарламентнинг Мудофаа қўмитаси раҳбари Мари-Агнес Штрак-Циммерман Ғарб бирдамлиги  йўқолганига иддао қилмоқда. Бу ҳадқа у “Welt”га берган интервьюсида маълум қилди.

“Ғарб бирлиги бугунги тундан кечиктирмай ахлатга ташланди. Бир тарафда Россия турибди, улар уруш, аннекция қилади, жазосиз ўлдиради. Иккинчи тарафда эса Трамп қўли остидаги АҚШ турибди, у бутунлай қадриятлар компасини йўқотган ва фақат ўз эгосини биринчи ўринга қўйган. Европа ва унинг ҳамкорлари ҳаракат қила бошлашлари керак, акс ҳолда биз тарих саҳифаларида фақат эслатма сифатидагина қоламиз”, деган Циммерман.

Норвегия Ташқи ишлар вазири Эспен Барт Эйде ҳам АҚШ – Россия саммити якунлари бўйича ижобий фикрда эмас. У бугун, 16 августда Ослода Трамп ва Путин учрашуви юзасидан матбуот-анжумани ўтказди.

Вазир бир гуруҳ журналистларга Россияга нисбатан санкцияларни қўллаш давом этишини маълум қилди.

“Владимир Путин босим сусайган, деган тасаввурга эга бўлиши мумкин эмас. Биз Россияга нисбатан босимни сақлаб қолишимиз ва ҳатто кучайтиришимиз керак. Бу Москвага Украинага босқин учун бадал тўлашга мажбур этиладиган аниқ сигнал бўлади”,  деди Эспен Барт Эйде.

Норвегия Ташқи ишлар вазирининг айтишича, ҳозирча унда Аляскадаги учрашув мазмуни ҳақида кам маълумот бор. Унинг фикрича, ҳеч қандай аниқ қарорлар қабул қилинмаган, бу эса учрашув олдидан берилган ишораларга мос келади. Эйде анжуманда нутқ сўзларкан,  Путинни вақтдан ютишга уринаётганликда айблаб, бунда катта хавф борлигини таъкидлаган.

“Путин АҚШни Европадан ва қолган иттифоқдошлардан ажратишга ҳаракат қилаётганига ҳеч қандай шубҳа йўқ”, деди у. 

Вазирнинг сўзларига кўра, бунга йўл қўймаслик учун қаттиқ ҳаракат қилиш зарур. Ҳам Украина, ҳам унинг европалик иттифоқдошлари учун Трамп Украина ҳукумати иштирокисиз Украина номидан ҳеч қандай имтиёз бермагани жуда муҳим эди. Эйде Аляскада бундай ҳолат кузатилмаган, деган таассуротга эгалигилигини билдирган.

Литва Мудофаа вазири Довиле Шакалене эса Аляскадаги саммит ҳақида Х ижтимоий тармоғида берган изоҳида Россия Президентини Европа ҳамда Украинага нисбатан яширин таҳдидларда айблади.

Путинни уруш жиноятчиси деб номлаган Шакалане Россия раҳбарининг сўзларини қайд этаркан,  Путин АҚШ Президентига қарата: сизни соғлом ва тирик ҳолда кўриб турганимдан жуда хурсандман, дегани уни ажаблантирганини ёзган.

У, шунингдек, Россия Украинада тинч аҳолини бомбардимон қилишни давом эттираётганини қўшимча қилган.

Эслатиб ўтамиз, олдинроқ Европа Иттифоқи (ЕИ) давлат раҳбарлари Аляскада Россия ва АҚШ Президентлари – Владимир Путин ва Дональд Трамп ўтказган саммит якунларига оид баёнот эълон қилганди.

Дилбар Шоакромова