Футболнинг катта қироли 40 ёшни қаршилади

Бугун, 5 февраль куни футбол тарихидаги энг яхши футболчиларидан бири, Чемпионлар лигасининг бир неча карра ғолиби, терма жамоаси билан Европа ва Миллатлар лигаси кубоги соҳиби, фаолиятидаги голлари сонини 923 тага етказиб олган Криштиану Роналду 40 ёшни қарши олди.

Катта футболга қадам

Криштиану Роналду 1985 йилнинг 5 февралида Португалиянинг Фуншал шаҳрида туғилди. Унинг исмидаги Роналду номини ота-онаси АҚШ собиқ президенти Рональд Рейганга атаб қўйган. Криштиану болалик чоғлариданоқ футболга меҳр қўйган. Унинг ҳаваскор футболдаги илк клуби “Андоринья” бўлган. Кейинчалик у бир муддат “Насьональ”да ва 1997 йилдан бошлаб “Спортинг”да машғулот олиб борган. Профессионал футбол фаолиятини илк бор “Спортинг” клубида 2002 йилда бошлаган ва дебют мавсумдаёқ 25 та ўйинда 3 та гол уришга эришди.

Роналдуни Роналду қилган Фергюсон

2003 йилнинг 13 августида Криштиану Роналду “Олд Траффорд”да расман “Манчестер Юнайтед” футболчиси сифатида таништирилади. Дастлаб, у клуб сафида 28-рақам остида майдонга тушади, аммо ўзи 7-рақамни хоҳларди. Бироқ бу рақам остида Жорж Бест, Брайан Робсон, Эрик Кантона, Дэвид Бекхэм каби афсонавий футболчилар ўйнаган ва бу масъулиятни бўйнига олишга қўрққан. “Манчестер Юнайтед” сафидаги дебют ўйини 2003 йилнинг 16 августида АПЛ доирасида “Болтон” жамоасига қарши бўлган. Жамоа таркибидаги илк голини эса ўша йилнинг 1 ноябрь куни “Портсмут”га қарши жарима зарбасидан киритган. Чемпионлар лигасининг 2004 йилги мавсумида “Манчестер Юнайтед” сафида “Порту”га қарши ўйинда Роналду асосий таркибда майдонга тушади. Мавсум якунига кўра, клуб 3-ўринни қайд этади. Жамоа бош мураббийи Алекс Фергюсон ҳам Роналдунинг ўйинларидан кўнгли тўларди ва кейин унга 7-рақамда ўйнашини айтади.

“Сен 28-рақамда эмас, энди 7-рақамда ўйнайсан”, дейди Фергюсон.

Мураббий ва футболчининг муносабатлари яхши эди. Роналду кейинчалик берган интервьюсида шундай дейди:

“Бир куни отам шифохонада эди. Мен эса табиийки тушкунликка тушдим. Мураббий билан гаплашдим. Кейин у 2-3 кун отангнинг ёнида бўл, деди. Аммо олдинда жамоани қийин ўйинлар кутиб турганди. Ўша пайтда мен клубнинг асосий футболчиларидан бири эдим. Лекин Фергюсон менинг вазиятимни тушунган ва менга уйимга кетишга рухсат берган”, дейди Роналду.

КриРонинг Мадриддаги шонли 9 йили

Англиядаги муваффақиятли фаолиятдан кейин Роналду 2009 йилнинг 6 июлида “Реал Мадрид” футболчиси сифатида таништирилади. Ўша куни таништирувга “Сантьяго Бернабеу”га 80 минг мухлис ташриф буюрганди. У таништирув вақтида “Uno, dos, tres Hala Madrid” дея мухлислар билан яқин бўлиб олганди. Кейинчалик бундай таништирувларни клубнинг янги футболчилари одат қилиб олди. Килиан Мбаппе, Эндрик кабилар шу усулдан фойдаланишди.

Роналду “Реал” таркибида дастлаб, 9-рақам остида ўйнайди. Чунки у вақтлар Мадрид жамоаси 7-рақами Испания футболи афсонаси Рауль Гонсалесга тегишли эди. Унинг “Қироллик клуби”даги дебюти 2009 йилнинг 29 августида “Депортиво”га қарши рўй беради ва ўша ўйиндаёқ у жамоаси таркибидаги дастлабки голини киритади. 2010/11 йилги мавсумда Рауль клубни тарк этади ва 7-рақам Криштиануга ўтади. 

9 йил давомида Криштиану “Реал Мадрид” билан 2 мартадан Ла Лига, Испания кубоги ва Испания Суперкубоги, 4 карра Чемпионлар лигаси ва 2 карра UEFA Суперкубоги ва 3 марта клублар ўртасидаги жаҳон чемпионати ғолибига айланди. Шунингдек, Роналду умумий 140 та Чемпионлар лигаси тарихидаги энг яхши тўпурар ҳам бўлди. У Мадриддаги шунча йиллик фаолиятида клуб сафида умумий 292 та ўйинда майдонга тушиб, 311 та гол уришга муваффақ бўлди.

А Серияга саёҳат

Криштиану 9 йиллик Мадриддаги фаолиятидан кейин 2018 йилнинг 10 июлида Италиянинг “Ювентус” клубига ўтади. А Серия етакчиси таркибида 2018 йилдан 2021 йилга қадар фаолият олиб борган Роналду барча мусобақаларда 98 та ўйинда майдонга тушиб, 81 та гол уришга муваффақ бўлди.

Жонажон “Юнайтед”га қайтиш

2021 йилнинг 27 августида Роналду яна “Манчестер Юнайтед”га қайтди. Унинг келиши билан Кавани 7-рақамни Криштиануга бўшатиб берди. Ўша вақтда Роналдунинг принцпиал рақобатчиси Лионель Месси ҳам фаолиятини ПСЖда давом эттиришга қарор қилганди. Собиқ клубига қайтиши биланоқ мухлислар футболчини илиқ кутиб олди. Аммо 2022 йилда “Манчестер Юнайтед” бош мураббийи этиб тайинланган Эрик Тен Хаг Криштиану билан уришиб қолади ва футболчи 2022 йилнинг ноябрь ойида клубни тарк этади. Таъкидлаш керакки, Роналду “Манчестер Юнайтед” сафида 2003 йилдан 2009 йилгача 196 та ўйинда 84 та гол урган бўлса, 2021/22 йилги мавсумда 40 та ўйинда майдонга тушиб, 19 та гол уришга улгурди.

“Ал-Наср”га ўтиш

Роналду 2023 йилнинг охирида, яъни 30 декабрь куни барча футбол мухлисларининг эътиборини ўзига қаратиб, кутилмаганда Саудияга йўл олишга қарор қилди. У “Ал-Наср” билан 2.5 йилга мўлжалланган шартнома имзолади. Ҳужумчи 2023 йилнинг январь ойида “Ал-Таи”га қарши дебют ўйинда майдонга тушади. 2023/24 йилги мавсумда у йилнинг энг сермаҳсул футболчиси бўлди.

Португалия терма жамоасидаги фаолият

Роналду Португалия терма жамоасида 2003 йилнинг 20 августида 18 ёшида дебютни амалга оширади. Ҳозирги кунга келиб, у терма жамоа сафида умумий 217 та ўйинда майдонга тушиб, 135 та гол уришга муваффақ бўлди ва бу борада футбол тарихида рекорд ўрнатди. 

Шахсий ва жамоавий совринлар

Дастлаб шахсий совринларига тўхталиб ўтсак, у 2008, 2013, 2014, 2016, 2017 йилларда 5 карра “Олтин тўп” соҳибига айланган. 7 карра Чемпионлар лигасининг энг яхши тўпурари. 2009 йилда унинг “Манчестер Юнайтед” сафида урган голи энг чиройли гол деб топилди ва “Пушкаш” совринига эга чиқди. 4 карра “Олтин бутса” соврини соҳиби. У бу унвонга 2008, 2011, 2014 ва 2015 йилда эришган. 2016 ва 2017 йилда 2-марта “The Best” совринини қўлга киритди.

Клублар миқёсида “Спортинг” билан Португалия Суперкубоги соҳиби. “Манчестер Юнайтед” билан 2006/07, 2007/08, 2008/09 йилги мавсумда АПЛ чемпиони, 2008 йилги клублар ўртасидаги Жаҳон чемпиони ва 2007/08 йилги мавсум Европа Чемпионлар лигасида зафар қучган. “Реал” билан 4 марта Чемпионлар лигаси кубоги, 2 каррадан Ла Лига, Испания Суперкубоги ва UEFA Суперкубоги соҳиби. 3 карра клублар ўртасидаги жаҳон чемпионатида ғолиб чиқди. “Ювентус” билан 2 карра А Серия чемпиони, 2 марта Италия Суперкубоги ва 1 марта Италия Кубоги ғолиби бўлди. “Ал-Наср” билан 2023 йилда Араб Чемпионлар лигаси чемпиони. 

Португалия терма жамоаси билан 2016 йилда Францияда ўтказилган Европа чемпионати ғолиби ва 2018/19 йилги мавсумда UEFA Миллатлар лигасида зафар қучган. 

40 ёшни қаршилаган футболнинг катта қироли умумий футболчилик фаолияти давомида умумий 1261 та ўйинда майдонга тушиб, 923 та гол ва 257 та ассист амалга оширди. Унинг айни дамдаги мақсади голлари сонини 1000 тага етказиш.