Францияда тартибсизликлар бошланганидан бери 2,4 минг киши ҳибсга олинди – ОАВ

Франция полицияси ва жандармлари мамлакатда тартибсизликлар бошланганидан бери 2,4 мингга яқин одамни ҳибсга олди. Бу ҳақда француз оммавий ахборот воситалари хабар берди.

Маълумотларга кўра, Францияда 28 июнга ўтар кечаси 31 киши, 29 июнь куни 182 киши, кейинги куни 875 киши ва 1 июль куни 1311 киши ҳибсга олинган. Мамлакат бўйлаб жами 2399 киши ҳибсга олинган.

1 июлга ўтар кечаси Франция расмийлари 30 июнга ўтар кечасидагидан кўра кўпроқ куч ишлатган. Хусусан, кўчаларда хавфсизликни таъминлашга 45 минг нафар полициячи жалб қилинган. Бундан ташқари, расмийлар миллий жандармнинг 18 та бронетранспортёрдан иборат зирҳли гуруҳидан фойдаланишга қарор қилган.

Безорилар билан тўқнашувда 79 нафар полициячи ва жандарм яраланган. Шунингдек, кеча тунда 1350 та автомобиль ёқиб юборилган, 234 та бино зарар кўрган.

Шанбага ўтар кечаси энг йирик тартибсизликлар Марсель, Лион, Сен-Этьен, Тулуза, Бордо, шунингдек, Сен-Денида бўлиб ўтган.

Франциядаги вазият 

Жорий йилнинг 27 июнь куни Парижга яқин Нантер шаҳрида йўл ҳаракати қоидаларини бузган Наэль исмли 17 ёшли жазоирлик йигитни полиция тўхтатган. Бироқ Наэль полицияга бўйсунмаган. Полициячи эса унга қарата ўқ узган. Ҳайдовчи кўкрагига ўқ тегиб вафот этган.  

Шундан сўнг, мамлакатнинг турли шаҳарларида тартибсизликлар бошланган. 29 июнь куни бир неча ўнлаб полиция машиналари, комиссарлик ва маъмурий органлар бинолари ёқиб юборилган, таълим муассасаларига зарар етказилган. 30 июнга ўтар кечаси Ички ишлар вазирлиги давом этаётган тартибсизликларни бостириш учун 40 минг полициячини сафарбар этган. Мамлакатнинг айрим шаҳарларида махсус кучлар кўчаларни патруль қилишда зирҳли техника ва вертолётлардан фойдаланган.

Айрим шаҳарларда соат 21:00 ёки 22:00 дан бошлаб комендантлик соати, шунингдек, тунги вақтда жамоат транспортида чекловлар жорий этилган. Мамлакатда вазият кескинлигича қолмоқда.

Франция Президенти Эммануэль Макрон Twitterʼда марҳумнинг оила аъзолари ва яқинларига ҳамдардлик билдирган. Шунингдек, Макрон Франциядаги тартибсизликлар ортидан ЕИнинг Брюсселдаги саммитини тарк этган.