Флик “Барселона”ни хоҳлаганича бошқаради – Лапорта

Испаниянинг “Барселона” жамоаси президенти Жоан Лапорта клуб бош мураббий Ханси Фликка эркинлик беришини ва немис мутахассиси хоҳлаганича фаолият юритиши мумкинлигини айтди. Бу ҳақда Лапорта “Mundo Deportivo” нашрига берган интервьюсида маълум қилди.

“Агар мен қайта президент этиб сайлансам, Флик “Барселона”ни хоҳлаганича бошқаради. У нафақат ажойиб мураббий, балки ажойиб инсон ҳамдир”, дейди Лапорта.

У шунингдек, Фликни шартнома имзолаган кундан бошлаб жамоага қўшган ҳиссасини юқори баҳолаган.

“Биз у билан шартнома имзолаган кунимиздан ўзгача бир нарса топганимизни англагандик. У янги ёш истеъдодларни тажрибали футболчилар билан бирлаштирган жамоани бошқаришда ҳақиқий истеъдодга эга. Флик “Барселона”нинг ҳозирги ҳолатига жуда мос келади. Унинг шарофати билан биз жуда яхши даврни бошдан кечирмоқдамиз”, дея қўшимча қилган Лапорта. 

Маълумот учун, Флик 2024 йилнинг ёзида Каталония жамоаси бош мураббийи этиб тайинланган эди. У ўтган мавсумда жамоа билан Ла Лига чемпионлиги, Испания ва Суперкубогини қўлга киритган.