ФҚБ Трампнинг собиқ маслаҳатчисининг уйида тинтув ўтказди (видео)

Федерал қидирув бюроси (ФҚБ) агентлари АҚШ Президенти Дональд Трампнинг миллий хавфсизлик бўйича собиқ маслаҳатчиси Жон Болтоннинг уйида тинтув ўтказди. Бу ҳақда “New York Post” хабар берди.

Нашр манбасига кўра, тинтув ФҚБ директори Кэш Пател бошлаган тергов доирасида ўтказилган.

“Ҳеч ким қонундан устун эмас. ФҚБ агентлари ўз вазифада”, деб ёзди Пател Х’да.

Тинтув ўтказилгани ҳақида “Fox News” ва CNN ҳам хабар берди. “New York Post” маълумотига кўра, тергов Болтоннинг 2020 йилда чоп этилган “The room where it happened: a White House memoir” (“Бу содир бўлган хона: Оқ уй хотиралари”) номли мемуарида сирли маълумотларни ошкор қилиши билан боғлиқ.

Қайд этилишича, Дональд Трамп китобнинг чоп этилишига тўсқинлик қилишга ҳаракат қилган, бироқ  бунга эриша олмаган. Трамп цензурага сабаб сифатида Болтон ишга қабул қилинганда махфийлик шартномасини бузганини айтиб ўтган. Манбаларда таъкидланишича, Болтон устидан тергов бир неча йил аввал бошланган, аммо Жо Байден маъмурияти уни “сиёсий сабабларга кўра” ёпиб қўйган.

Жон Болтон 2018 йил апрелидан 2019 йил сентябригача Трампнинг Миллий хавфсизлик бўйича маслаҳатчиси лавозимида ишлаган. Трамп уни истеъфога чиқариб, кўп таклифларига қатъиян қўшилмаганини айтган. Трамп маъмуриятида Болтон Россия, КХДР ва Эронга нисбатан “қаттиқ чизиқ” тарафдори сифатида танилган эди.

Жорий йилнинг январида Трамп иккинчи марта президентликка қайтгач, Болтон Жо Байден даврида, Эрон таҳдидлари сабаб берилган Махфий хизмат ҳимоясидан маҳрум қилинганини маълум қилган. Трампнинг иккинчи президентлик даврида ўтган олти ой давомида Болтон унинг Украинага ва Россияга оид сиёсатини, шунингдек, Москва билан музокараларга юборилган маслаҳатчиси Стив Уиткофф фаолиятини бир неча бор танқид қилган.

Аляскадаги саммитдан сўнг эса у: “Трамп ютқазгани йўқ, лекин Путин очиқчасига ютди”, деб айтган.