Фицо Путин ва Зеленский билан учрашмоқчи 

Словакия Бош вазири Роберт Фицо яқин кунларда Хитой Раиси Си Цзиньпин, Россия Президенти Владимир Путин ва Украина раҳбари Владимир Зеленский билан учрашишни режалаштирмоқда. Бу ҳақда у кеча, 1 сентябрь куни Facebook’да эълон қилинган видеомурожаатида маълум қилди.

Фицо бугун, 2 сентябрь куни Пекинда Путин билан, 4 сентябрь куни эса Си Цзиньпин билан учрашади. 5 сентябрь куни эса Бош вазир Словакиянинг шарқида Зеленский билан музокара ўтказишни режалаштирган. Пекинда 3 сентябрда Иккинчи жаҳон урушида Япония таслим бўлганининг 80 йиллиги муносабати билан ҳарбий парад ўтказилади ва Фицо ҳам кўплаб давлат етакчилари каби ушбу парадда ҳозир бўлади. 

Видеомурожаатида Фицо Европа Иттифоқи раҳбарлари Пекиндаги парадга келмагани учун афсус билдирган. 

“Янги кўп қутбли дунё тартиби, янги кучлар мувозанати шаклланмоқда, бу эса глобал барқарорлик учун муҳим эди”, дея қўшимча қилган Словакия Бош вазири. 

Фицо ўзининг нейтрал позицияда экани иддао қилиб келади. У Россия ва Украина ўртасидаги урушда “тинчлик ўрнатишда воситачи” ролини ўйнашни истайди, аммо бу ҳозирча амалга ошмаган. Танганинг икки тарафи бўлганидек, европаликлар вазирнинг гапини унча йоқламайди. Зеленский ҳамда Европа Иттифоқи сиёсатчилари уни Москвага нисбатан ҳаддан ташқари дўстона сиёсатда айбламоқда.

Қайд этиш жоиз, Словакия ва Украина муносабатлари кескин совуқлашиб бормоқда. Икки ўртадаги гина Украина Қуролли кучларининг “Дружба” нефть қувурига ҳужумлари сабабли юзага келди. Бу қувур орқали Россия нефти Марказий Европага етказиларди, аммо ҳужумлар туфайли баъзида етказиб бериш қисқа муддатларга тўхтаб қолди.

Маълумот учун, эртага, 3 сентябрь куни Пекинда кенг кўламли парад бўлиб ўтади. Маросим 70 дақиқа давом этади, унда Хитой Халқ-озодлик армияси анъанавий қўшин турлари ва Қуролли кучларнинг янги бўлимлари – 45 экипаж, илғор ракета технологиялари, танклар, самолётлар ва миллий ишлаб чиқаришнинг учувчисиз тизимларини тақдим этади.

Эслатиб ўтамиз, Украина кучларининг “Дружба” нефть қувурига зарба бергани ҳақида илк хабарлар 22 август куни матбуотда тарқалган. Ушбу йўл орқали Венгрияга ҳам нефть етказиб берилар эди. Будапештга кўра, қувур камида беш кунга ишдан чиққан. Ҳужумга учраган қувур Россиянинг Брянск вилоятидан ўтади.