Финляндия Россиядан қочганларни оммавий равишда қувмоқда

Финляндия ҳукумати Россиянинг Украинага қарши уруши бошланганидан кейин бу мамлакатга борган Россия фуқароларини оммавий равишда депортация қилмоқда. Бу ҳақда “Вот-Так” хабар берди.

Қайд этилишича, жорий йилнинг январь ойидан сентябргача 104 россиялик мамлакатдан чиқариб юборилган. Сабаби – уларнинг бошпана сўровлари рад этилган.

Россиялик фаол Максим Алиевнинг сўзларига кўра, уруш бошлангандан буён икки йил давомида бошпана сўрови учун умуман суҳбатлар ўтказилмаган, фақат 2024 йилнинг охиридан бошлаб интервьюлар бошланган ва оқибатда деярли 90 фоиз мурожаатлар рад этилган. Кўплаб россияликлар қарордан қониқмай судларга шикоят қилган, айримлар эса яна такроран бошпана учун мурожаат қилган.

Рад этишларнинг асосий сабаби – мурожаатчилар Россиядан сафарбарликдан қочгани, дея баҳоланмоқда. Мамлакат фуқаролари урушга боришни хоҳламагани учун бошқа мамлакатга кўчишга ҳаракат қилаётгани таҳнмин қилинмоқда. Финляндия миграция хизмати бундай ҳолатни бошпана бериш учун етарли сабаб деб ҳисобламайди, чунки расмийларга кўра, Россияда сафарбарлик якунланган.

Баъзи россияликлар Финландияни тарк этишни истамагани учун мажбурий равишда чиқариб юборилган. 2025 йилнинг саккиз ойида бундай усулда 18 киши депортация қилинган. Одатда улар Туркияга ёки Эстония орқали мамлакатдан қувилган, аммо Россия билан тўғридан тўғри чегаралар ёпилган.

Бошпана олишга муваффақ бўлганлар эса асосан Россия қарорларидан норози кайфиятдагилар ёки Россияда таъқибга учраган собиқ депутатлар бўлган. 

Эслатиб ўтамиз, Финляндия 2023 йилнинг ноябрь ойида Россия Федерациясидан Европа давлатига киришга уринаётган мигрантлар сони кескин ошгани сабабли Россия билан чегарасини ёпган эди. Россия ва Финляндия ўртасида жами тўққизта қуруқликдаги чегара ўтиш пунктлари мавжуд бўлиб, улар бутунлай ёпиқ. Ҳатто Финляндия фуқаролари ҳам улар орқали ўз мамлакатига кириш ҳуқуқига эга эмас. Чекловлар ҳозиргача амал қилиб келмоқда.