FIFA норозиликлардан сўнг арзон ЖЧ чипталарини таклиф қилди

Кеча, 16 декабрь куни FIFA кўплаб  норозиликлардан сўнг Жаҳон чемпионатини арзонроқ қилиш мақсадида, малакали жамоалар мухлислари учун 60 долларлик чипталарнинг оз сонли қисмини таклиф қилди. Бу ҳақда “Reuters” нашри хабар берди.

FIFA маълум қилишича, ушбу чегирмали чипталар турнирнинг барча 104 та ўйинини, жумладан финални ҳам қамраб олади. Арзонроқ чипталар иштирокчи миллий футбол ассоциацияларининг (PMA) ажратмаларини 10 фоизини ташкил қилади.

PMA’лар ўз навбатида, миллий жамоаларни қўллаб-қувватловчи мухлисларга устуворлик бериш учун чипталарни тақсимлаш жараёнини бошқаради. Бу ассоциациялар, шунингдек, “содиқ мухлислар” учун чипталарни ажратишда ўз мезонларини белгилашади.

Шунингдек, PMA чипталар дастурлари орқали ариза топширган ва жамоалари плей-офф босқичига чиқа олмаган мухлислар пулни қайтариш сўровлари учун маъмурий тўловлардан озод қилинади.

Ушбу эълон, 2026 йилги Жаҳон чемпионати олдидан, Канада, Мексика ва Қўшма Штатларда бўлиб ўтадиган турнир чипталарига оид нархлардан норозиликлар кучайиб бораётган бир пайтда амалга оширилди. 

Аввалроқ, Европа футбол мухлислари ассоциацияси (EFSA) FIFA’ни “товламачилик” чипта нархларини белгилашда айблаган, бу эса оддий мухлисларнинг тадбирга ташриф буюришига тўсқинлик қилиши мумкинлиги ҳақида хавотирларни келтириб чиқарганди.

Қарама-қаршиликларга қарамай, FIFA 11 декабрда бошланган ва 13 январгача давом этадиган сотувнинг учинчи босқичидаги қуръа ташлаш маросимига катта қизиқиш билдирилганини маълум қилди.

Эслатиб ўтамиз, аввалроқ FIFA томонидан Жаҳон чемпионатига белгиланган чипталар нархларининг оширилиши сабаб Португалия ва Нидерландия мухлислар уюшмалари 2026 йилги Жаҳон чемпионатини бойкот қилмоқчи эди.