FIFA мундиал учун янги қоида киритди

Кеча, 28 апрель куни Канаданинг Ванкувер шаҳрида бўлиб ўтган махсус йиғилишда Халқаро футбол қоидалари кенгаши (IFAB) камситувчи ва ноўрин хатти-ҳаракатларни бартараф этиш учун FIFA томонидан таклиф қилинган иккита қоидага тузатиш киритишни бир овоздан маъқуллади. Бу ҳақда ташкилотнинг расмий сайтида хабар берилди.

Тасдиқланган янги қоидага кўра, рақиб билан тўқнашув ёки бошқа ҳолатларда оғзини ёпган футболчиларга қизил карточка кўрсатилади. Кенгаш Ванкувер шаҳрида махсус йиғилиш ўтказиб, Шимолий Америкада ўтадиган Жаҳон чемпионати олдидан номақбул хатти-ҳаракатларга қарши қаратилган ўзгартишларни қабул қилган.

“Мусобақа ташкилотчисининг қарорига кўра, рақиб билан тўқнашув пайтида оғзини ёпган ҳар қандай ўйинчи қизил карточка билан жазоланиши мумкин”, дейилади IFAB баёнотида.

Бу ўзгариш Европа чемпионлар лигасидаги ўйиндан кейин киритилган. Унда “Бенфика” жамоаси ўйинчиси Жанлука Престианни “Реал Мадрид” футболчиси Винисиус Жуниорга нисбатан ҳақоратли сўзлар айтган ва буни яшириш учун либосини оғзига тортиб олган эди.

Яна бир янги қоидага кўра, ҳакам қароридан норози бўлиб майдонни тарк этган ўйинчилар ҳам қизил карточка олади. Бу қоида жамоа расмийларига ҳам тааллуқли бўлиб, агар улар ўйинчиларни норозилик сифатида майдонни тарк этишга ундаса, уларга ҳам жазо қўлланади.

FIFA президенти Жанни Инфантино бу ўзгаришларни Африка миллатлар кубоги финалидаги кескин ҳолатдан сўнг илгари сурган. Унда Сенегал жамоаси ўйинни асосий вақти тугамай тарк этган эди. Жамоа январ ойидаги финалда мезбон Марокашга пенальти берилганидан сўнг, ҳисоб 0:0 бўлиб турган пайтда майдонни тарк этган. Ўйин қарийб 15 дақиқага тўхтатилган. Кейинчалик Сенегал қўшимча вақтда гол уриб, ғалаба қозонган, аммо кейин апелляция натижасида чемпионлик унвонидан маҳрум қилинган. Иш Швейцариянинг Лозанна шаҳридаги Спорт арбитраж судида кўриб чиқиладиган бўлди.

IFAB маълум қилишича, Жаҳон чемпионатида иштирок этадиган барча 48 жамоа яқин ҳафталарда ушбу ўзгартишлар ҳақида хабардор қилинади. 

Маълумот учун, ўтган ҳафта UEFA Престианнига олти ўйинга дисквалификация жазосини берди, шундан учтаси шартли ҳисобланади. У ҳомофобик ҳақорат ишлатгани учун жазоланди. Ирқий ҳақорат исботланмаган, ўйинчи эса буни рад этган, аммо ҳомофобик сўз ишлатганини тан олган. Агар Престианни Аргентина терма жамоасига чақирилса, у Жаҳон чемпионатидаги дастлабки икки ўйинни ўтказиб юборади.

Эслатиб ўтамиз, аввалроқ FIFA’нинг чипталарни қайта сотиш сайтида Жаҳон чемпионати финали учун тўртта чипта савдога қўйилгани, уларнинг ҳар бири деярли 2,3 миллион долларга тенг эканлиги ҳақида хабар берилган эди.

Ойбек Рустамов