Ёзда “Реал”дан кетадиган Анчелотти Бразилия термасини бошқармайдиган бўлди

Мадриднинг “Реал” клуби бош мураббийи Карло Анчелотти Бразилия футбол конфедерасияси (CBF) вакили ҳамроҳлигида Лондонда бўлиб ўтган йиғилишда шартнома имзолаш ва “пентакампеонлар”ни бошқариш таклифини қабул қилишдан бош тортди. Бу ҳақда Испаниянинг “Marca” нашри хабар берди.

Манбага кўра, италиялик мутахассис CBF президенти Эдналдо Родригес билан боғланиб, кўрсатилган қизиқиш учун ўз миннатдорлигини билдирган. Ҳозирда мураббий Саудия Арабистонининг номи ошкор этилмаган клубидан жиддий таклифни кўриб чиқмоқда.

Қайд этилишича, Анчелотти клублар ўртасидаги жаҳон чемпионатида “қаймоқранглилар”ни бошқаради ва фақат ушбу турнирдан сўнг “Реал”ни тарк этиб, бошқа жамоани бошқаради.

Шунингдек, Карло Анчелотти “Реал”дан товон пули сифатида 4 миллион евро сўрагани кўрсатилган, бироқ клуб бу таклифни рад этган. Италиялик мутахассис “қироллик клуби” билан бир йиллик шартномадан воз кечиши кутилмоқда.