Этна вулқони яна отилди (видео)

Сицилиядаги Этна тоғидан баландлиги 6,5 км (2,3 миля) га етган улкан вулқон кул, газ ва тош устуни отилди. Бу ҳақда “Euronews” хабар берди.

Этна тоғи Европадаги энг йирик фаол вулқондир, бироқ Италия расмийлари ҳозирда аҳоли учун ҳеч қандай хавф йўқлигини айтмоқда.

Италия Миллий геофизика ва вулоқоншунослик институти (INGV) маълумотларига кўра, отилиш табиати кратернинг ён томонларидан бирида тош қулаши содир бўлганини кўрсатади.

“Кузатув камералари жануби-шарқий кратернинг шимолий ёнбағридаги материалнинг қулаши оқибатида юзага келган пирокластик оқимни қайд этди”, дейилади хабарда.

Пирокластик оқим – юқори ҳароратли вулқон газлари, кул ва тош қолдиқларининг портлаш ҳаракати натижасида юзага чиқадиган аралашма.

Бундай оқимлар атрофдаги ҳудудлар учун ўта хавфли бўлиши мумкин, аммо ҳозирча таҳдид белгилари йўқ.

Сицилия вилояти раҳбари Ренато Шифанининг сўзларига кўра, уни маҳаллий ҳокимият доимий алоқада бўлган мутахассислар бунга ишонтирган. INGV’нинг сўнгги баёнотида айтилишича, вулқон оқими ҳали Арслон водийсидан ўтгани йўқ, бу чўққига яқинлашишдаги пиёда маршрутлари кесишган нуқта.

Бу зарурат туғилганда хавфсизлик чораларини кўриш учун расмийларга етарли вақт беради.

Вилоят фуқаролик мудофааси бўлими бошлиғи Салво Кочина сайёҳларга “табиат ҳодисаси ривожланиши эҳтимоли борлиги сабабли” ҳудудга бормасликни тавсия қилди. Вулқон булути туфайли ҳаво транспорти учун қизил огоҳлантириш берилди, бироқ яқин атрофдаги Катания аэропорти ҳамон нормал режимда ишламоқда.

Сейсмологларнинг таъкидлашича, Этнанинг ҳозирги фаоллиги маълум вақтдан бери кузатилмоқда.

Жорий йилнинг 13 май куни Катания яқинидаги жануби-шарқий кратер ҳудудида лава оқими қайд этилди, у икки оқимга бўлинди – бири тоғнинг жанубий ёнбағрига, иккинчиси шарққа отилди.

Эмиссия кучли шовқин билан бирга бўлди, уни Катания ва вулқон атрофида жойлашган бошқа аҳоли пунктлари аҳолиси эшитган.

Мутахассисларнинг фикрича, бу Этна фаолиятининг жорий йилдаги 15-қисми, май ойидаги иккинчиси бўлди.

Эслатиб ўтамиз, аввалроқ АҚШнинг Гавайи оролидаги Килауэа вулқони отилишни бошлаганди. Килауэа вулқони охирги марта 2023 йилнинг июнь ойида отилган. Вулқон оғзига яқин жойда ўрнатилган видеокамераларда баландлиги 80 метрдан ошадиган лава гейзерлари ҳосил бўлгани суратга тушган. Бундан олдинги отилишлар бир ҳафтадан бир йилгача давом этган.