Эронга қарши уруш АҚШга ҳозиргача $37,5 миллиардга тушди – Хегсет (видео)

Эронга қарши уруш учун АҚШга ҳозиргача 37,5 миллиард долларсарфлади. Бу ҳақда кеча, 21 июль куни АҚШ Мудофаа вазири Пит Хегсет Вашингтондаги Конгресс эшитувида маълум қилди. 

Хегсет Вашингтондаги Конгресс эшитувида омма орасида қўллаб-қувватланмаётган можаро учун шошилинч молиялаштиришни сўрар экан, мазкур маблағ уруш билан боғлиқ айрим харажатлар ҳамда 30 сентябргача кутилаётган сарф-харажатларни ўз ичига олишини айтган.

Ноябрь ойида бўлиб ўтадиган оралиқ сайловларга олти ой қолган бир пайтда, Президент Дональд Трампнинг Республикачилар партияси Вакиллар палатаси ва Сенатдаги кўпчилигини сақлаб қолиши қийинлашиши мумкин. Демократлар эса жамоатчилик фикри сўровларида юқори натижалар қайд этиб, Эрон уруши мавзусини аҳоли турмуш қимматлашуви билан боғлашга ҳаракат қилмоқда.

Пентагон ушбу 37,5 миллиард долларлик ҳисоб-китоб қандай шакллантирилганига аниқлик киритмаган. Трамп ўтган ой Конгрессдан қарийб 90 миллиард долларлик қўшимча маблағ сўраган бўлиб, унинг асосий қисми Эрон билан боғлиқ ҳарбий ҳаракатларга ажратилиши кўзда тутилган. Бу эса урушдан норози бўлган қонун чиқарувчилар билан яна бир баҳсга сабаб бўлиши кутилмоқда.

“Президент можарони кенгайтириш ва уруш жиноятлари содир этиш билан таҳдид қилмоқда ҳамда бу яна бир чексиз урушга айланиши мумкинлигини айтмоқда”, деган сенатнинг Ассигнациялар қўмитасидаги етакчи демократи Пэтти Мюррей эшитувда. 

“Одамлар сиз ва бу маъмуриятдан норози бўлишининг сабаби – аввал айтган гапларингиз билан ҳозирги баёнотларингиз бир-бирига тўғри келмаяпти. Уруш ё тугади, ё тугамади. Икки ҳафта дейсиз, кейин бошқача дейсиз. Ракеталар бор дейсиз, кейин йўқ дейсиз”, деган демократ сенатор Кирстен Гиллибранд.

Шунингдек, Хегсет қонун чиқарувчиларни қўшимча маблағ ажратишга чақириб, акс ҳолда ҳарбий тайёргарлик машғулотларини қисқартиришга тўғри келишини айтган. Уруш Пентагоннинг қарийб 1 триллион долларлик бюджетига жиддий босим ўтказмоқда ва ҳарбий хизматчиларни таъминлаш билан боғлиқ харажатларга ҳам таъсир кўрсатиши мумкин.

Қўшма штаб бошлиқлари қўмитаси раиси генерал Дэн Кейн эшитувда хизматчилар маошини тўлаш имкони топилишини, аммо техникага хизмат кўрсатиш ва келгуси ҳарбий имкониятларга сармоя киритиш қийинлашиши мумкинлигини тан олган. Хегсет эса қонун чиқарувчиларни нафақат қўшимча маблағ сўровини, балки 2027 йил учун 1,5 триллион долларлик мудофаа бюджети лойиҳасини ҳам қўллаб-қувватлашга чақирган.

“Бу идорани 1,5 триллион доллар миқдорида молиялаштирмаслик мамлакатимиз олдидаги энг катта таҳдид, деб ҳисоблайман”, деган у.

Эслатиб ўтамиз, аввалроқ Яқин Шарқдаги можаронинг нархи қанча эканлиги тўғрисида QALAMPIR.UZ мақоласи эълон қилинганди.