Эрон Трампга янги суиқасд устида ишлаяпти – WSJ

АҚШ ва Эрон ўртасидаги кескинлик яна кучайиб бораётган бир пайтда, “The Wall Street Journal” газетаси диққатга сазовор баёнот билан чиқди. Нашрнинг хабарига кўра, Исроил Вашингтон маъмуриятига Эрон АҚШ Президенти Дональд Трампга суиқасд қилишнинг янги режасини тайёрлаётгани ҳақидаги разведка маълумотларини тақдим этган.

Хабарда айтилишича, Эрон режалари ҳақидаги маълумотлар Америка расмийларига етказилган, бироқ разведка маълумотлари қачон ва қайси канал орқали узатилгани ҳақида маълумот берилмаган.

Мақолада айтилишича, АҚШ 2020 йилда Эрон “Ислом инқилоби қўриқчилари” корпуси Қуддус кучлари қўмондони Қосим Сулаймонийни ўлдирганидан сўнг, Теҳрон маъмурияти Трампга бир неча бор очиқчасига таҳдид қилган.

Хабарда, шунингдек, АҚШ ва Исроил ҳужумлари оқибатида ҳалок бўлгани хабар қилинган Эроннинг собиқ олий раҳбари Оятуллоҳ Али Хоманаийнинг дафн маросимларида Трампнинг ўлимига чақириқлар эшитилгани айтилади.

2024 йил 13 июль куни Трамп Пенсильвания штатининг Батлер шаҳридаги сайловолди митингида қуролли ҳужум оқибатида ўнг қулоғидан яраланганди.

2024 йил 15 сентябрь куни Флорида штатининг Уэст-Палм-Бич ҳудудидаги гольф клубида бўлган қуролланган шахснинг пистирмага уриниши Махфий хизмат томонидан сўнгги лаҳзада тўхтатилди.

Эслатиб ўтамиз, жорий йилнинг 25 апрель куни Трамп ва унинг кабинети аъзолари иштирокида Оқ уй мухбирлари уюшмасининг кечки овқатига режалаштирилган қуролли ҳужумга уриниш Махфий хизмат томонидан гумонланувчининг ҳибсга олиниши билан тўхтатилганди.