Эрон терма жамоасининг яна икки аъзоси Австралиядан бошпана сўради

Аввалроқ, футбол бўйича Эрон аёллар терма жамоасининг 5 нафар аъзоси ўлим таҳдидларидан сўнг Австралиядан бошпана олган эди. Эндиликда терма жамоанинг яна икки аъзоси Австралиядан сиёсий бошпана сўраб, мурожаат қилди. Бу ҳақда CNN хабар берди.

Кеча, 10 март куни Австралия Ички ишлар вазири Тони Бурке Осиё кубогидан сўнг ватанига қайтишдан бош тортган беш нафар эронлик футболчига Австралияда қолиш учун виза берилишини эълон қилди.

Манбага кўра, кейинчалик яна бир нафар аёл футболчи ҳамда мураббийлар штабининг бир аъзоси ҳам Эронга қайтишдан бош тортиб, бошпана сўраган.

Маълумот учун, жорий йилнинг 2 март куни Эрон аёллар терма жамоаси Осиё кубогининг гуруҳ босқичида Жанубий Кореяга қарши ўйин олдидан мамлакат мадҳиясини куйлашдан бош тортганди. Хабарларга кўра, Эрон расмийлари бу ҳаракатни хиёнат сифатида баҳолаган. Айрим шахслар футболчиларга мамлакатга қайтгандан сўнг ўлим таҳдидлари ҳам йўллаган.

АҚШ Президенти Дональд Трамп Австралия Бош вазири Энтони Албанесе билан телефон орқали суҳбатлашганидан сўнг, Австралия Эрон аёллар терма жамоаси аъзоларига сиёсий бошпана беришга тайёрлигини билдирган эди.

Шу билан бирга, Эрон Бош прокуратураси терма жамоа футболчилари “хотиржам ва ишонч билан” мамлакатга қайтиши мумкинлигини маълум қилди.