Эрон хавфсизлик масаласида FIFA’дан кафолат сўрамоқда

Эрон футбол федерацияси президенти Меҳди Тож FIFA президенти Жанни Инфантино билан  АҚШ, Канада ва Мексикада бўлиб ўтадиган Жаҳон чемпионатида Эрон терма жамоасининг хавфсизлигини таъминлаш масаласини муҳокама қилиш ниятида эканини билдирди. Бу ҳақда TRTarabi хабар берди.

Бир ҳафта олдин Канада расмийлари Меҳди Таж ва яна икки федерация вакилига Торонто аэропортида мамлакатга киришга рухсат бермаган. Улар Ванкувер шаҳрида ўтказилган FIFA конгрессига йўл олган эди.

Турнир тақвимига кўра, Эрон терма жамоаси гуруҳ босқичида АҚШнинг Инглвуд шаҳрида Янги Зеландия (16 июнь) ва Бельгия (21 июнь) жамоаларига қарши майдонга тушади. Кейин эса Сиэтл шаҳрида Миср (27 июнь) билан ўйнаши режалаштирилган.

Меҳди Тожнинг айтишича, Эрон терма жамоаси Жаҳон чемпионатида иштирок этишга жиддий ёндашмоқда, аммо бунинг учун FIFA’дан тўлиқ хавфсизлик кафолатлари талаб қилинади.

“Биз Жаҳон чемпионатида иштирок этишга жиддий қараймиз, аммо буларнинг барчаси Жанни Инфантино билан учрашувимизга боғлиқ. FIFA бизга турнирда иштирок этиш учун зарур хавфсизлик кафолатларини бериши керак. Мезбон давлатларда, хусусан Канададаги каби ҳолатлар қайта такрорланмаслиги кафолатланиши лозим. Агар бизга ҳурмат билан муносабатда бўлинса ва давлатимизга қарши ҳақоратлар бўлмаса, иштирок этишда муаммо бўлмайди. Акс ҳолда, бунга мос жавоб қайтарамиз”,  дейди Тож.

Унинг қўшимча қилишича, Эрон жамоаси фақат FIFA қоидаларига амал қилади ва сиёсий босимлардан мустақил равишда ҳаракат қилади.

“Бизнинг АҚШ билан ҳеч қандай алоқамиз йўқ. Миллий терма жамоа жаҳон чемпионатига чиқиш ҳуқуқини ўз меҳнати билан қўлга киритган. Биз Трамп ёки бошқаларга эмас, FIFA’га жавоб берамиз. Агар ҳақоратли ҳолатлар такрорланса, биз Канадада кўрсатган муносабатимизни яна такрорлашимиз мумкин ва ҳатто жамоанинг қайтиши эҳтимоли ҳам бор”,  дейди у.

Аввалроқ, Эрон Спорт вазири Аҳмад Донямали жорий геосиёсий вазият сабабли Жаҳон чемпионатида иштирок этиш қийинлашиши мумкинлигини айтган эди. Бу баёнот АҚШ Президенти Дональд Трамп Эроннинг турнирдаги иштирокини ноўрин деб атаганидан сўнг янграган.

Кейинчалик Осиё футбол конфедерацияси вакили Виндзор Жон Эрон ҳали ҳам Жаҳон чемпионатида иштирок этишни режалаштираётганини маълум қилганди.