Эрон бу йил ҳисобига иккинчи сунъий йўлдошини орбитага учирди

Бугун, 14 сентябрь куни Эрон Инқилобий гвардияси томонидан қурилган ракета ёрдамида орбитага тадқиқот сунъий йўлдоши учирилди. Бу ҳақда “Reuters” хабар берди.

Қайд этилишича, Qaem-100 сунъий йўлдош ташувчиси томонидан коинотга учирилган Chamran-1 сунъий йўлдоши 550 километр орбитага чиқарилди ва унинг биринчи сигналлари қабул қилинди. Ушбу қурилмалар Инқилобий гвардиянинг Аэрокосмик кучлари томонидан ишлаб чиқилган.

Оғирлиги 60 кг бўлган сунъий йўлдошнинг асосий вазифаси баландлик ва фазода орбитал манёвр технологиясини намойиш қилиш учун аппарат ва дастурий таъминот тизимларини синовдан ўтказишдан иборат.

Шунингдек, Chamran-1 нинг яна бир миссияси коинотда совуқ газ ҳаракатининг қуйи тизимини ҳамда навигация, муносабатни бошқариш қуйи тизимларининг ишлашини баҳолаш ҳисобланади.

Маълумот учун, январь ойида ҳам Эрон оммавий ахборот воситалари Sorayya номли сунъий йўлдоши 750 км орбитага учирилгани, бу мамлакат томонидан ҳозиргача энг юқори кўрсаткич бўлганини хабар қилган эди.

АҚШ армиясининг даъво қилишича, сунъий йўлдошларни орбитага чиқаришда қўлланилган узоқ масофали баллистик технология Теҳронга узоқ масофали қуролларни, жумладан, ядровий каллакларни ҳам ишга туширишга имкон бериши мумкин.

Аммо Теҳрон ўзининг сунъий йўлдош фаолияти баллистик ракеталарни яратиш учун ниқоб эканлигини рад этади ва ҳеч қачон ядро қуролини яратишга интилмаганини айтиб келмоқда.