Эрон АҚШда бўлиб ўтадиган ЖЧ қуръасини бойкот қилди

Эрон футбол федерацияси АҚШ делегациянинг бир неча аъзоларига виза беришдан бош тортгани сабабли, Вашингтонда бўлиб ўтадиган Жаҳон чемпионати финал босқичига қуръа ташлаш маросимини бойкот қилади. Бу ҳақда “Tehran times” хабар берди.

“Биз FIFA’га қабул қилинган қарорларнинг спортга алоқаси йўқлигини ва Эрон делегацияси аъзолари қуръа ташлаш маросимида қатнашмаслигини маълум қилдик”, дея изоҳ берган федерация матбуот котиби давлат телевидениесига.

Шу тариқа, Эрон делегацияси жорий йилнинг 5 декабрь куни Вашингтонда бўлиб ўтадиган Жаҳон чемпионати гуруҳ босқичи қуръа маросимида қатнашмайди, чунки АҚШ ҳукумати федерациянинг бир неча аъзоларига, жумладан президент Меҳди Тожга виза беришдан бош тортган. Гарчи бошқа аъзоларга визалар берилган бўлса-да, Эрон делегацияси сиёсий сабаблар туфайли маросимни бойкот қилишга қарор қилган.

Маълумот учун, Эрон Жаҳон чемпионати саралашида Ўзбекистон билан бир гуруҳда ўйнаб, шу йилнинг март ойида ўтказилган учрашувлар натижасида финал босқичида иштирок этиш ҳуқуқини қўлга киритган эди.

Эслатиб ўтамиз, аввалроқ Ўзбекистон миллий терма жамоаси Жаҳон чемпионати учун қуръада 3-саватчадан, Эрон эса 2-саватчадан ўрин олиши ҳақида хабар берилган эди.