Эрон АҚШ санкцияларининг кучайишига тайёрлигини билдирди

Эрон ҳукумати АҚШ томонидан янги санкциялар жорий этилиши эҳтимолига қарши олдиндан тайёргарлик кўрганини билдирди. Мамлакатда иқтисодий муаммоларни енгиб ўтиш бўйича икки йиллик режа ишлаб чиқилган. Бу ҳақда кеча, 24 август куни Эрон Молия вазири Али Маданизода IRINN телеканалига берган интервьюсида маълум қилди.

Қайд этилишича, ҳукумат АҚШ санкцияларининг кучайишига қарши қандай чоралар кўришни олдиндан режалаштирган ва янги чекловларга тўлиқ тайёр.

“Вазирлар Маҳкамасида иқтисодиётни ривожлантириш бўйича икки йиллик режа мавжуд ва унда юзага келиши мумкин бўлган барча муаммолар ҳисобга олинган”, деган Маданизода.

Унинг билдиришича, Вашингтон Эрон иқтисодиётининг асосий “томирларини” узиш орқали ўз мақсадларига эриша олмайди.

Шунингдек, вазир аввалги уруш саноатга, хусусан, металлургия заводлари фаолиятига таъсир кўрсатганини қайд этган. Унинг айтишича, зарарланган корхоналар қайта тикланган ва мамлакатни ҳимоя қилиш давом эттирилмоқда.

Маълумот учун, айни пайтда АҚШ Эронга қарши санкциялар рўйхатини кенгайтирди. АҚШ Молия вазирлигининг маълумотларига кўра, рўйхатга 48 та юридик шахс, 24 нафар жисмоний шахс ва 6 та нефть ташувчи танкер киритилган.

Санкциялар рўйхатидан Озарбайжон, Греция, Ҳиндистон, Эрон, Хитой, Малайзия, Маршалл ороллари, Бирлашган Араб Амирликлари, Сингапур, Туркия, Украина, Франция ва Швейцариядаги фуқаролар ҳамда компаниялар ўрин олган.

Бундан ташқари, АҚШ Молия вазирлиги Эрон билан боғлиқ яна беш йўналиш келгусида иккиламчи санкцияларга тушиши мумкинлигини маълум қилди. Улар қаторига рақамли активлар, технологиялар, олтин, авиация ва денгиз ташувлари киради.

Вашингтоннинг таъкидлашича, Эрон ушбу соҳалардан иқтисодиётини қўллаб-қувватлаш учун фойдаланмоқда. Шу сабабли мазкур йўналишларда Теҳронга ёрдам бераётган шахсларга нисбатан ҳам санкция чораларини қўллаш имконияти кенгайтирилади.

Эслатиб ўтамиз, аввалроқ АҚШ Эронга қарши “тарихдаги энг қаттиқ санкциялар”ни жорий этишни режалаштираётгани ҳақида хабар берилган эди.