Эрон Ҳормуз бўйича яна шарт қўйди

Эндиликда Ҳормуз бўғози орқали ҳаракат фақат савдо кемаларига рухсат этилади. Бунинг учун кемалар Эрон Қуролли кучлари штабидан олдиндан рухсат олиши, белгиланган йўналишлар бўйича ҳаракатланиши ва бож тўловини амалга ошириши шарт. Бу ҳақда Эрон парламентининг миллий хавфсизлик қўмитаси раҳбари Иброҳим Азизий баёнот берди.

Унинг таъкидлашича, Ҳормуз бўғозидаги янги денгиз тартибини айнан Эрон белгилайди, ва бу қоидаларга амал қилиш вақти келган. Азизий, шунингдек, агар АҚШ томонидан энг кичик тўсқинлик бўлса ҳам бу бўғозни ёпиш учун асос бўлишини айтган.

Эрон парламенти спикери Муҳаммад Бағир Ғолибоф ҳам шунга ўхшаш фикр билдирган. Унга кўра, агар АҚШ ҳарбий-денгиз кучлари Эрон портларидан чиқаётган кемаларга тўсқинлик қилишда давом этса, Ҳормуз бўғози ёпилиши мумкин.

Бундан олдин, 17 апрель куни Эрон Ташқи ишлар вазири Аббос Ароқчи бўғоз яна очилганини маълум қилган эди. У бу қарорни Ливан ва Исроил ўртасида ўт очишни тўхтатиш келишуви кучга киргани билан боғлаган. Шу билан бирга, кемалар ҳаракати фақат келишилган йўналишлар бўйича амалга оширилиши айтилган. https://qalampir.uz/uz/news/%D2%B3ormuz-ochildi-tramp-eronga-minnatdorlik-bildirdi-135059

Эслатиб ўтамиз, Исроил ва Ливан ўртасида 34 йилдан кейин илк бор тўғридан-тўғри музокаралар ўтказилиб, 17 апрелдан бошлаб 10 кунлик сулҳ эълон қилинган эди. Ҳар икки томон музокараларни ижобий баҳолаган бўлса-да, сулҳ бошланганидан кўп ўтмай Ливан Исроилни келишувни бузишда айблади.