Эрон Ҳормуз бўғозини йиллар давомида очмоқчи эмас – ОАВ

Эрон узоқ йиллар давомида Ҳормуз бўғозини блокадада ушлаб туриш ва у ерга Америка кемаларини киритмаслик имкониятига эга. Бу ҳақда юқори лавозимли эронлик хавфсизлик амалдорига таяниб, “Press TV” хабар берди.

Теҳронда маълум қилишларича, илгари АҚШ айнан шу стратегик йўл орқали Яқин Шарқдаги ҳарбий базаларига қурол-яроғ етказиб берган. Эрон ўз ҳудудига берилган зарбалардан сўнг Ҳормуз бўғози орқали танкерлар ҳаракатини Вашингтон ва унинг иттифоқчилари учун чеклаган.

“Эрон бундай ҳолатни кўп йиллар давомида сақлаб туришга қодир”, деган нашрга интервью берган манба.

Амалдорнинг тушунтиришича, Эроннинг ушбу муҳим сув йўлига нисбатан “юқори сезгирлиги” шундан иборатки, тарихан Яқин Шарқдаги АҚШ ҳарбий базалари ва гарнизонларини таъминлаш учун ишлатилган ускуналарнинг катта қисми айнан шу бўғоз орқали ташилган.

Манбанинг айтишича, агар Эрон илгарироқ бўғоздаги ҳаракатни назорат қила бошлаганида, рақибнинг минтақадаги логистика имкониятлари анча чекланган бўларди.

“Шу сабабли Эрон энди бундай логистика операцияларининг амалга оширилишига йўл қўймайди”, дея қўшимча қилган у.

АҚШ ва Исроилнинг ҳарбий операцияси бошланганидан сўнг Теҳрон Ҳормуз бўғози орқали юк ташишни тўхтатганини эълон қилди. Оқибатда логистика харажатлари ва суғурта тўловлари кескин ошди, бу эса АҚШда инфляция босимини кучайтирди.

Ҳарбий ҳаракатлар бошланишидан олдин бу ҳудуд орқали дунё нефтининг 15–20 фоизи ва суюлтирилган табиий газнинг 30 фоиздан ортиғи ўтган.

Эслатиб ўтамиз, аввалроқ АҚШ Президенти Дональд Трамп Эронга Ҳормуз бўғозини очиш бўйича қўйилган ультиматум муддати тугаб бораётганини маълум қилганди. У Эрон расмийларини қўрқитиб, агар бўғоз очилмаса, мамлакат устида “дўзах” ёғилишини иддао қилганди. Теҳрон эса бу талабни рад этиб, АҚШ Президентининг ўзини “жаҳаннам қаърига юбориш” билан таҳдид қилганди.