Эрик Тен Хаг “Юнайтед”га қайси футболчини олиб келмоқчилиги очиқланди
Спорт
−
15 Апрель 2022 4747
"Манчестер Юнайтед" бошқарувига келиши мумкин бўлган Эрик Тен Хаг "Монако" ярим ҳимоячиси Аурелиен Тчуаменини “қизил иблислар” сафида кўрмоқчи. Бу ҳақда ESPN ўзининг манбаларига таяниб, хабар берди.
Шунингдек, манбанинг хабарига кўра, Тен Хаг апрель ойининг охирида “Манчестер Юнайтед” мураббийи сифатида расман тасдиқланиши мумкин.
"Юнайтед" раҳбарияти ёзги трансфер ойнаси учун ҳар бир позициядаги ўйинчиларнинг қисқа рўйхатини шакллантириб чиққан ва ушбу рўйхат юзасидан Тен Хагга ўз режаларини тақдим этишга рухсат берилади.
Эрик Тен Хаг Манчестерга олиб келмоқчи бўлган футболчилар орасида 22 ёшли Аурелиен Тчуамени биринчилардан бўлиб турибди. У Франция чемпионати Лига 1 да мавсумни яхши ўтказмоқда.
"Монако" ёзда юлдуз футболчиси учун трансфер музокараларига очиқ ва сотув нархи сифатида 60-70 миллион евро сўрайди. Пари Сен-Жермен (ПСЖ) ҳам француз футболчисига қизиқиш билдирмоқда. Аммо футболчининг ўзи Франциядан кетишни маъқул кўраётгани маълум.
Шунингдек, Лондоннинг "Челси" жамоаси Тчуаменини харид қилиш вариантига қизиқиб қолган. Улар ҳатто Аурелиеннинг агенти ва "Монако" билан ҳам трансфер борасида алоқа ўрнатди. Аммо “Юнайтед” “Челси”даги муаммолар сабабли Аурелианнинг трансферида устунлик қилиши мумкин.
Маълумот ўрнида, Аурелиен Тчуамени жорий мавсумда “Монако” сафида 44 та учрашувда майдонга тушиб, 3 та гол урди ва 2 та голли узатма амалга оширди. “Тransfermarkt” портали 22 ёшли футболчига 40 миллион евро нарх белгилаган.
Маъруф Абдумаликов
Live
Барчаси