Эрдўған уруш бошлангандан бери илк бор Украинага боради

Украина Туркия Президенти Ражаб Тойиб Эрдўғаннинг ташрифига ҳозирлик кўрмоқда. Бу ҳақда Украинанинг Туркиядаги элчиси Наримон Жалол “РБК-Украина”га берган интервьюсида айтиб ўтди.

Элчининг сўзларига кўра, айни пайтда Украина томони Туркия Президенти Ражаб Тойиб Эрдўғаннинг Украинага ташрифини ташкил этиш устида фаол ишламоқда. Эрдўғанга шахсий таклифни Президент Владимир Зеленский етказган, дипломатнинг таъкидлашича, унинг ўзи бу таклифни Туркия раҳбари билан яқинда бўлган учрашувида тасдиқлаган.

“Ушбу ташриф катта саъй-ҳаракатларни талаб қилади, чунки уни амалга оширишга тўсқинлик қилаётган кўплаб муаммолар мавжуд”, деди Жалол.

Дипломат, шунингдек, ташрифнинг асосий мавзуси Украина ва Туркия ўртасидаги эркин савдо битимини ратификация қилиш бўлиши мумкинлигини таъкидлади. Ушбу ҳужжат стратегик шериклик учун ҳам, Украина бизнесининг муҳим қисми учун ҳам муҳимдир.

“Президент Зеленскийнинг таклифи жуда оддий: Туркия эркин савдо шартномасини имзолашдан манфаатдор. Ушбу келишув бизнесимизнинг муҳим қисми учун ҳам аҳамиятлидир, гарчи бу баъзилар учун рақобат кучайгани сабабли кескинликни келтириб чиқариши мумкин бўлса ҳам. Бироқ, бу сиёсий қарор. Президент Зеленский Эрдўғаннинг ташрифи чоғида ушбу келишувни ратификация қилишни таклиф қилди, бу яхши ва рамзий қадам бўларди”, деб тушунтирди Жалол.

Эслатиб ўтамиз, Эрдўғон охирги марта Украинага уруш бошланишидан олдин – 2022 йил 3 февраль куни борган эди. Ўшанда Украинада Туркиянинг “Bayraktar” учувчисиз учоқларини ишлаб чиқарадиган завод қурилиши маълум қилинган эди. Шунингдек, Эрдўған Киев ва Москва ўртасидаги музокараларда воситачи бўлиш ташаббусини ҳам илгари сурган.