Эрдўған Трампни Сурияга қарши санкцияларни бекор қилишга кўндирган – Аҳмад аш-Шараа

Сурия Президенти Аҳмад аш-Шараа Туркия ва Саудия Арабистони ўтган йили мамлакатга қарши санкцияларни бекор қилиш бўйича воситачилик қилганини, Туркия Президенти Ражаб Тойиб Эрдўған эса бу масалада АҚШ раҳбарияти билан музокаралар олиб борганини айтди. Бу ҳақда у “Al Jazeera” телеканалига берган интервьюсида маълум қилди.

Аш-Шараанинг сўзларига кўра, Эрдоған АҚШ ва Президент Дональд Трамп билан музокаралар ўтказиб, Сурияга нисбатан қўлланилган санкцияларни бекор қилишга эришишга ҳаракат қилган.

“Президент Эрдоған Сурияга нисбатан қўлланилган санкцияларни бекор қилиш учун АҚШ ва Президент Трамп билан воситачилик қилди. Ўша пайтда Сурияга чекловлар қўйган “Цезарь қонуни” амалда эди. Бу санкциялар аввалги режим томонидан содир этилган жиноятлар сабаб жорий қилинган эди. Бироқ ағдарилган режимдан қутулган Сурия халқининг ушбу санкциялар таъсирида қолиши мантиққа тўғри келмасди. Саудия Арабистони ва Туркиянинг саъй-ҳаракатлари натижасида Президент Трамп ишонч ҳосил қилди ва “Цезарь қонуни” доирасидаги санкцияларни бекор қилди”, деган аш-Шараа.

Эслатиб ўтамиз, АҚШ Президенти Дональд Трамп 8 июль куни НАТОнинг Анқарадаги саммити доирасида Сурия Президенти Аҳмад аш-Шараа билан учрашувдан сўнг Шараага алоҳида жўнатган хатида Сурияни АҚШнинг терроризмни қўллаб-қувватловчи давлатлар рўйхатидан чиқаришга қарор қилганини билдирганди.