Эпштейн ишида янги даъво: адвокат ва ҳисобчи миллионлардан қуруқ қолиши мумкин

АҚШнинг Нью-Мексико штати марҳум молиячи Жефри Эпштейннинг адвокати ва ҳисобчисига унинг меросидан пул тўланишини тўхтатиш учун судга мурожаат қилди. Шунингдек, штат Эпштейннинг жинсий зўравонлигидан жабр кўрганлар учун товон ундиришни сўрамоқда. Бу ҳақда “Reuters” хабар берди.

Нью-Мексико Бош прокурори Раул Торрезнинг маълум қилишича, даъво Эпштейннинг адвокати Даррен Индайк ва ҳисобчиси Ричард Канга қарши киритилган. Улар Эпштейннинг жинсий савдо билан боғлиқ фаолиятига ёрдам бериш, уни молиялаштириш ва яширишда айбланмоқда.

Даъво аризасига кўра, Индайк ва Кан Эпштейннинг 107 миллион долларлик меросини бошқарувчи ҳамижрочилар ҳисобланади. Уларнинг ҳар бири меросдан мос равишда 50 миллион ва 25 миллион доллар олиши мумкин.

Бироқ уларнинг адвокати Дэниел Вайнер айбловларни рад этган. Унинг айтишича, Индайк ва Кан аёлларга нисбатан жинсий зўравонликка била туриб ёрдам берган эмас. Адвокат жиноятлар улар бўлмаган жойларда содир этилганини таъкидлаган.

“Эпштейн ёлғиз ҳаракат қилмаган. Унинг ўлими жиноятларига ёрдам берган шахсларни жавобгарликка тортиш ҳаракатларига чек қўймайди”, деган Торрез.

Нью-Мексико штати жорий йилнинг февралида Эпштейннинг Zorro Ranch ранчосидаги фаолияти юзасидан терговни қайта бошлаган эди. Эпштейн ушбу ҳудудда қарийб 30 йил давомида аёллар ва қизларга нисбатан зўравонлик қилганликда айбланган. Бироқ тергов бошланганидан саккиз ой ўтиб ҳам жиноий айбловлар илгари сурилмаган.

Бундан ташқари, штат Эпштейн иши бўйича таҳрир қилинмаган ҳужжатларни олиш учун АҚШ Адлия вазирлигини судга берган. Штат расмийлари Дональд Трамп маъмуриятини терговга тўсқинлик қилишда айбламоқда. Вазирлик эса айрим ҳужжатлар тақдим этилганини, бироқ шахсий маълумотларни ҳимоя қилиш талаблари сабабли материалларнинг катта қисмини бериш имкони бўлмаганини билдирган.

Эпштейннинг жинсий савдо тармоғидан жабр кўрган икки аёл – Юлия Молчанова ва Анушка Де Жоржио судга мурожаат қилинишини қўллаб-қувватлаган. Уларнинг фикрича, Эпштейннинг жиноятларига била туриб ёрдам берган ва унинг меросидан фойда кўриши мумкин бўлган шахслар ҳам жавобгарликка тортилиши керак.

Эпштейннинг шериги Жизлейн Максвелл 2022 йилда вояга етмаган шахсни жинсий савдога жалб қилиш ва шу билан боғлиқ жиноятларда айбдор деб топилиб, 20 йилга қамалган.

Эслатиб ўтамиз, америкалик молиячи Жефри Эпштейн 2019 йил август ойида Нью-Йоркдаги қамоқхонада ўлик ҳолда топилган. Жорий йил бошида АҚШ Адлия вазирлиги Эпштейн ишига оид минглаб саҳифалик янги ҳужжатларни эълон қилганди. Шунингдек, Эпштейннинг ҳуқуқий вориси ва унинг икки ҳамкори қарийб 40 нафар жабрланувчига 35 миллион долларгача компенсация тўлашга келишиб олган эди.