Энди автобусда йўлкирани тўламаганлар СИ орқали ушланади

Ўзбекистонда тез орада автобусларда йўл ҳақини тўламаган йўловчиларни сунъий интеллект орқали аниқлаш тизими йўлга қўйилиши мумкин. Бу ҳақда жорий йилнинг 14 май куни “Тошшаҳартрансхизмат” АЖда ўтказилган матбуот анжуманида маълум қилинди. 

Билдирилишича, жорий йилда тўрт ой ичида 50 мингдан зиёд фуқаро Тошкент шаҳридаги автобусларда йўл ҳақини тўламагани аниқланган. Уларнинг 70 фоизи талабаларни ташкил этган. “Тошшаҳартрансхизмат”га кўра, чиптасиз йўловчиларни сунъий интеллект орқали назорат қилиш режалаштирилмоқда. 

“Сунъий интеллект ёрдамида йўловчиларни йўл ҳақини тўламаганлигини назорат қиладиган ечим ишлаб чиқилган. Барча маълумотлар бизда бор. Қайси йўналишда сурункали равишда қайси йўловчи тўламаётганигача биламиз”, дейди “Тошшаҳартрансхизмат” АЖ Бошқарув раисининг рақамлаштириш ва сунъий интеллект жорий этиш бўйича маслаҳатчиси Шоҳруз Хожиев. 

Унинг билдиришича, йўловчиларнинг барча ҳаракатларини автобуслардаги камераларга интеграция қилинган сунъий интеллект орқали таҳлил қилиш мумкин. Унинг айтишича, СИ орқали ҳар бир эшик ёнига ўрнатилган тўлов аппаратининг ёнидан ўтган йўловчи алоҳида таҳлил қилинади.

Эслатиб ўтамиз, аввалроқ 7 майдан бошлаб Тошкент автобусларида совутиш тизими – кондиционерларнинг ишлаб туриши мажбурий бўлиши ҳақида хабар берилган эди.