Эквадорнинг плей-оффга чиқиши ортидан мамлакатда дам олиш куни эълон қилинди

Эквадор Президенти Даниэль Нобоа мамлакат миллий терма жамоасининг 2026 йилги Жаҳон чемпионати 1/16 финалига чиққанини нишонлаш муносабати билан 26 июнни дам олиш куни деб эълон қилди. Бу ҳақда Президентнинг ижтимоий тармоқдаги баёноти ва 431-сонли Президент фармонида маълумот берилган.

Бунга Эквадор терма жамоасининг бугун, 26 июнь куни гуруҳ босқичи сўнгги турида мусобақа фаворитларидан бири бўлган Германияни 2:1 ҳисобида мағлуб этиб, плей-офф йўлланмасини қўлга киритгани сабаб бўлди.

“Танқидлар, ҳақоратлар ва қийинчиликларга қарамай, ўзини тиклаб, бутун мамлакатга шундай улкан қувонч бағишлаган футболчилар ва мураббийлар штабига раҳмат. Эртага байрам! Яшасин Эквадор!” дейди Нобоа.

Эквадор терма жамоаси ўз тарихида бешинчи марта Жаҳон чемпионатида иштирок этмоқда. Жамоанинг мундиаллардаги энг яхши натижаси 2006 йилда 1/8 финалга чиққанидир.

Германияга қарши ўйиндаги ғалаба орқали Эквадор “Э” гуруҳида 4 очко билан учинчи ўринни эгаллади ва учинчи ўрин соҳиблари ўртасидаги умумий рейтингда биринчи поғонага кўтарилди.

Мусобақа низомига кўра, гуруҳларда учинчи ўринни эгаллаган 12 та жамоадан энг яхши 8 таси плей-офф босқичига чиқади. Ҳозирда Эквадор ушбу 8 таликдан тушиб кетмайдиган жамоалар сирасига киради.