Эден Азар Премьер-лига Шон-шараф залига киритилди

Лондоннинг “Челси” жамоаси собиқ футболчиси Эден Азар Премьер-лига Шон-шараф залига киритилди. Бу ҳақда “The Standart” нашри хабар берди.

Бельгиялик собиқ ярим ҳимоячи “Реал Мадрид”га ўтишидан аввал “Челси” сафида Англия Премьер-лигасида 7 йил давомида фаолият олиб борган. У “Челси” таркибида 85 та гол уриб, 54 та голли узатмани амалга оширган ва клуб тарихидаги энг ёрқин футболчилардан бирига айланган.

Азар бу шарафни Жон Терри, Дидье Дрогба, Фрэнк Лэмпард, Петр Чех ва Эшли Коул каби “Челси” афсоналари билан бир қаторда қўлга киритди.

“Менинг орзум энг юқори савияда ўйнаш эди ва мен бунга эришдим. Бу мен учун катта бахт. Ҳафтадан ҳафтага энг муҳим ўйинларда иштирок этасиз, мавсум охирида эса жамоадошларингиз билан кубокни кўтарганингизда – бу жуда гўзал туйғу. Мен Премьер-лигада 7 йил давомида фаол ўйнаганимдан фахрланаман.  Мен ҳар доим майдонда завқ билан ўйнашни ва мухлисларни хурсанд қилишни истаганман. Бу тарзда эътироф этилиш мен ва оилам учун ғурур. Брейн-ле-Контдан чиққан кичкина бельгиялик бола сифатида 34 ёшимда буюклар қаторида бўлиш – буни фақат  орзу қилиш мумкин эди”, дейди Эден Азар.

Шунингдек, Азарнинг собиқ устози “Челси” билан Премьер-лига чемпионлигини қўлга киритган мураббийи Жозе Моуринью ҳам собиқ шогирдини табриклаган.

“Эден, сени Премьер-лига Шон-шараф залига кирганинг билан табриклайман. Ҳамма сени бу ўринга лойиқ эканингни билади. Сен мен билан ишлаган энг истеъдодли футболчилардан бирисан. Сен энди тарихда қолдинг ва айтмоқчи, “Челси” билан мен учун сўнгги чемпионликни ютишда ёрдам берганинг учун катта раҳмат”, дейди Жозе Моуринью.

Маълумот учун, Эден Азар 2012–2019 йиллар оралиғида “Челси” да ўйнаб, лондонликлар билан икки марта Премьер-лига чемпионлигини, шунингдек, бир марта Европа Лигаси ғолиблигини қўлга киритган.