Эболани эплаб бўлмаяпти. Қурбонлар сони 2 700 дан ортди

Конго Демократик Республикасида Эбола эпидемияси оқибатида 2700 дан ортиқ одам вафот этди ҳамда 5600 дан зиёд ҳолат қайд этилди. Бу ҳақда ЖССТнинг Африкадаги фавқулодда вазиятлар бўйича директори Мари Розелин Белизер 26 август куни ўтказилган брифингда маълум қилди.

Унинг сўзларига кўра, Конгода Эбола билан касалланиш ҳолатлари ошишда давом этмоқда. Айрим йўналишларда вазият яхшиланаётгани кузатилаётган бўлса-да, касалликнинг тарқалиши ҳануз жуда фаол.

“Тарқалиш жараёни ҳамон жуда фаол. Биз унинг тезлашишини секинлаштирдик, аммо эгри чизиқни ҳали пасайтира олмадик”, деди Белизер.

ЖССТ вакили Конго Демократик Республикасидаги эпидемия Эбола тарихидаги иккинчи энг кўп ўлим қайд этилган эпидемия эканини таъкидлади. Ташкилот маълумотларига кўра, касалликни жиловлаш бўйича амалга оширилаётган чоралар тарқалиш суръатига етиб олишда қийналмоқда.

Шу билан бирга, мамлакатда касалланганлар билан алоқада бўлганларни аниқлаш ва тест ўтказиш ишлари яхшилангани қайд этилди. Мутахассислар Бундибугио штамми бўйича ўтказилган таҳлилларда вируснинг тез тарқалаётганига қарамай, ҳозирча мутация белгилари аниқланмаганини маълум қилди.

Конгодаги вазиятдан фарқли ўлароқ, қўшни Угандада Бундибугио штамми сабабли юзага келган Эбола эпидемияси расман якунланган.

Уганда ҳукумати 28 июль куни мамлакат Эбола касаллигидан холи эканини эълон қилган. ЖССТ эса касалликнинг яширин юқиш занжирлари қолмаганига ишонч ҳосил қилиш учун вазиятни август ойининг охиригача кузатган.

Угандада эпидемия даврида жами 20 та касалланиш ҳолати қайд этилиб, икки киши вафот этган.

ЖССТ маълумотларига кўра, Угандадаги эпидемия тугаган бўлса-да, Конго Демократик Республикасида Эбола тарқалишининг давом этаётгани минтақа учун жиддий хавф бўлиб қолмоқда.

Эслатиб ўтамиз, аввалроқ Конгода Эбола эпидемияси назоратдан чиқиб, вирус 2 500 дан ортиқ инсоннинг ҳаётига зомин бўлгани ҳақида хабар берилган эди.