Эҳтиёт бўлинг! Ўзбекистонда яна бир дори муомаладан чиқарилди

Ўзбекистонда “Tutukon Neo” дори воситаси зарур ишлаб чиқариш амалиётини бузгани учун муомаладан чиқарилди. Соғлиқни сақлаш вазирлиги ҳузуридаги Дори воситалари, тиббий буюмлар ва тиббий техника экспертизаси ва стандартлаштириш давлат маркази фуқароларни мазкур дори воситасидан огоҳ бўлишга чақирди.

Маълум қилинишича, Испаниянинг “Дори воситалари ва тиббий буюмлар агентлиги” (AEMPS қарорига биноан, Испаниянинг “Labaratorio Miquyel Y Garriga Inc, S.L.” корхонаси томонидан ишлаб чиқарилган “Tutukon Neo” (флаконларда) дори препаратининг “Зарур ишлаб чиқариш амалиёти (GMP)” талаблари бузилгани аниқланган.

Марказ мазкур дорининг Ўзбекистон ҳудудига кириб келган бир қатор серияларини фармацевтика бозоридан муомаладан қайтариб олинаётганлигини маълум қилган.

Эслатиб ўтамиз, Ўзбекистонда ўтган йили 20 нафар бола Ҳиндистоннинг Marion Biotech фармацевтика фирмаси ишлаб чиқарган “Док-1 Макс” йўтал сиропларини истеъмол қилиши оқибатида вафот этган эди.