Дунёнинг энг кекса футболчиси яна бир йил футболда қоладиган бўлди

Япониялик 59 ёшли футболчи Кадзуёши Миура “Йокогама” клуби билан янги бир йиллик шартнома имзолади. Бу ҳақда жамоа матбуот хизмати маълум қилди.

Клуб хабарига кўра, футболчининг янги келишуви бир мавсумга мўлжалланган. Миура келаси мавсумни Япония учинчи дивизиони вакили – “Фукусима Юнайтед” клубида ижара асосида ўтказади.

Кадзуёши Миура 2005 йилдан буён “Йокогама” футболчиси ҳисобланади. У фаолияти давомида Япониянинг “Сузука Пойнт Геттерс” ва “Атлетико Судзука”, Австралиянинг “Сидней” ҳамда Португалиянинг “Оливейренсе” клубларида ижара асосида тўп сурган.

Шунингдек, тажрибали ҳужумчи Бразилиянинг “Палмейрас”, “Коритиба” ва “Сантос”, Хорватиянинг “Динамо Загреб” ҳамда Италиянинг “Женоа” жамоалари шарафини ҳам ҳимоя қилган.

Маълумот учун, Миура Япониянинг икки карра чемпиони ҳисобланади. У миллий терма жамоа билан 1992 йилги Осиё кубогида ғолиб чиққан. Келаси 2026-2027 йилги мавсум унинг профессионал фаолиятидаги 42-мавсум бўлади.