Дунёда хотира тақчиллиги хавфи: барча қаттиқ дисклар сотиб бўлинди

Қаттиқ диск (HDD) ишлаб чиқарувчилари 2027 йилгача бўлган барча маҳсулотларни сотиб бўлди. Йирик компаниялар – Seagate ва Western Digital ишлаб чиқараётган HDD’ларнинг деярли барчасини олдиндан харид қилиб, корпоратив бозор учун эркин етказиб бериш имкониятини қолдирмаган. Бу ҳақда iXBT хабар берди.

Қайд этилишича, энг йирик қаттиқ диск ишлаб чиқарувчилари яқин йиллар учун ишлаб чиқариш қувватлари тўлиқ тақсимлаб бўлинганини маълум қилган. Бу асосан сунъий интеллект инфратузилмаси жадал ўсиши билан боғлиқ.

Ҳисобот анжуманларида Seagate ва Western Digital вакиллари 2026 йил учун мўлжалланган барча маҳсулот ҳажми сотиб бўлинганини, 2027–2028 йилларга мўлжалланган таъминотнинг бир қисми эса узоқ муддатли шартномалар асосида банд қилинганини тасдиқлаган.

Тианг Ю Таннинг айтишича, компания 2026 йил охиригача деярли тўлиқ буюртмалар билан таъминланган ва кейинги йиллар учун ҳам бир қатор мижозлар билан келишувларга эришган. Дэйв Мосли ҳам шунга ўхшаш ҳолатни айтиб, компанияда яқин икки йил учун бўш ишлаб чиқариш қуввати қолмаганини айтган.

Соҳавий манбаларга кўра, учинчи йирик ишлаб чиқарувчи – Toshiba’да ҳам вазият ўхшаш, аммо компания ҳозирча расмий баёнот бермаган.

Қаттиқ дисклар шахсий компьютер ва ноутбукларда деярли йўқолиб бораётган бўлса-да, катта ҳажмдаги маълумотларни сақлашнинг энг арзон усули бўлиб қолмоқда. Шу боис HDD’лар дата-марказлар, булутли платформалар ва йирик сунъий интеллект моделларини ўқитиш билан шуғулланувчи компаниялар томонидан фаол қўлланилмоқда.