“Давлатимиз бойияпти, камбағал гадой бўляпти”. 200 кВт машмашаси

“Ўзбекэнерго, 200 кВтлик лимитни бекор қилинглар” – бу ўзбекистонликлар ижтимоий тармоқларда уюштираётган флешмобда янграётган сўзлар. Унда қатнашганлар сони ҳозиргача 100 мингдан ошди. Ўзбекистонда “свет” нархи оширилиб, унга 200 кВтлик меъёр қўйилганига 2 ой бўлди. Ўтган вақт мобайнида одамларнинг чўнтагидан ортиқча пул айнан “свет” учун чиқаётгани билиниб қолди. Олдинлари электр энергиясига бир ой учун 100 минг тўлаганлар бугунга келиб, 200-300 минг сарфламоқда. Белгиланган меъёр эса кўпчилик оилаларнинг эҳтиёжлари учун камлик қилмоқда. Буни QALAMPIR.UZ ўтказган сўровномада қатнашган ўзбекистонликлар ҳам тасдиқлади.

Суҳбат асносида электр энергияси учун белгиланган 200 кВт лимит етяптими, деган саволга жавобан респондентларнинг катта қисми ушбу чекловга қаршилигини, барча хонадон учун ҳам бу лимит етмаслигини билдиришди.

“200 кВт лимит етаётгани йўқ, барчангизга маълум, ҳар бир хонадонда қишин-ёзин 1-2 та кондиционер, 1 та музлаткич ишлайди, табиийки 200 кВт дан ошиб кетади. Лимит одамларни қийнайди, буни йўқ қилиш керак”, дейди респондентлардан бири.  

“Ўзим ҳам 62 га кирганман, шунга қарамай рўзғорга кўмаклашиш учун ишлайман. Ишдан чиқиб уйга борганимда кондиционердан фойдаланаман, 2 кунда 300 кВт га яқин “свет” ишлатибмиз. Иссиқ ҳавода қийналяпман. Ҳаво совиткичларисиз одамларнинг соғлиги ёмонлашмоқда. Ҳовлимиз ҳар куни тозаланади, шунга қарамай тезда чанг бўлади, ҳаво чанглигидан ҳовлида ўтиролмасам, тоза ҳаводан нафас ололмасам, уйда кондиционердан фойдалана олмасам, бу нима деган гап?! Мен-ку амалларман, маҳалламизда турмуш шароити оғир оилалар бор, ҳаттоки нонга ҳам пул тополмай ўтиришади, мен берган қаттиқ нонларга “раҳмат” дейди. Ҳаммасига инсоф берсин. “Свет” нархини туширишсин, халқ қийналяпти”, дейди яна бир иштирокчилардан бири. 

“Ким буни қилди? 200 кВт нима дегани бу? Бу бутунлай ҳақиқатдан йироқ, лимитни 400 кВт қилишсин, ундан кейин майли. Чарчадим, пенсиям етмаяпти. Бу чиллада кондиционер ёқмасдан ўтириб бўлмайди, буни ўзингиз ҳам яхши биласиз”, дейди яна бири.

Тўлиқ видеони QALAMPIR.UZ'нинг YouTube’даги саҳифасида кўришингиз мумкин.